SQO-da 43 jetim bala páter kezeginen negizsiz alynǵan

<p>PETROPAVL. KAZINFORM &ndash; Soltústik Qazaqstan oblysynyń prokýrorlary jetim jáne ata-anasynyń qamqorlyǵynsyz qalǵan balalar quqyqtarynyń óreskel buzylǵandyǵyn anyqtady.</p>

SQO prokýratýrasynyń málimetinshe, qadaǵalaýshy organ jergilikti atqarýshy organdardy tekserdi.

Ǵ.Músirepov atyndaǵy aýdan ákimdiginiń laýazymdy tulǵalary «Turǵyn úı qatynastary týraly» QR Zańynyń talaptaryn buza otyryp, turǵyn úıge 2010 jyldan beri kezekte turǵan 43 jetim balany turǵyn úı kezeginen negizsiz alyp tastaǵan.

Al, Aqjar aýdany men Petropavl qalasynyń qorǵanshylyq jáne qamqorshylyq organdary Zańnyń 71-babynyń talaptaryna qaıshy 3 aı boıy 6 jetim balany turǵyn úı kezegine qoımaǵan.

Aıyrtaý, Aqjar, Aqqaıyń, Ǵ.Músirepov, Qyzyljar, M.Jumabaev, Mamlıýt, Taıynsha aýdandary men Petropavl qalasyndaǵy balalardyń qamqorshylary «Neke jáne otbasy týraly» QR Kodeksiniń 126-babyn buza otyryp, qamqorlyǵyndaǵylardyń tárbıesi men kútip-baǵý týraly júıeli negizde esep bermegen.

Qyzyljar, Ǵ.Músirepov, Tımırıazev aýdandarynyń qorǵanshylyq jáne qamqorshylyq organdary kámeletke tolmaǵandardyń paıdasyna zańdy ókilderden alımentterdi májbúrlep óndirip alýdy baqylaý sharalaryn júrgizbegen.

Prokýratýranyń aktileri boıynsha 8 laýazymdy tulǵa, onyń ishinde aýdandyq bilim bóliminiń 2 basshysy tártiptik jaýapkershilikke tartylyp, zań buzýshylyqtar joıyldy.

Júrgizilgen jumystardyń nátıjesinde jetim balalar men ata-anasynyń qamqorlyǵynsyz qalǵan balalardyń quqyqtaryn qorǵaýǵa múmkindik týdy.

Buǵan deıin SQO-da qadaǵalaýshy organnyń aktilerin elemegen laýazymdy tulǵalardyń jazalanǵanyn aıtqan edik.