SQO-da 42 eldi mekendi sý basý qaýpi bar

PETROPAVL. QazAqparat – Sınoptıkter Soltústik Qazaqstan oblysynda naýryzdyń úshinshi onkúndiginde kún jylynyp, qar qarqyndy erı bastaıtynyn boljaýda. Óńirde 42 eldi meken sý basýy múmkin qaýipti aımaqta ornalasqan, dep habarlaıdy QazAqparat tilshisi.

SQO Tótenshe jaǵdaılar departamenti baspasóz qyzmetiniń málimetinshe, bıyl Esil ózeni basseınindegi sý qory jyldaǵydan 69% joǵary. Keı kólderde sý mólsheri azaıǵanymen, kúzde topyraqtyń 12% ylǵal jınaýy, jer qabatynyń orta eseppen 54 sm deıin qatýy ótken jylǵy kórsetkishten joǵary. Bul erigen qar sýynyń jolynda ornalasqan 1,5 myńǵa jýyq turǵyny bar 42 eldi meken úshin qaýip tóndiredi.

«Oblys boıynsha jalpy 6 myńnan astam turǵyny bar 85 eldi meken esepke alynǵan. Onyń 30-y ózen deńgeıiniń kóterilýinen, 13-i kólder sýynyń tasýynan, 42-si erigen qar sýynan zardap shegýi múmkin.

Sý tasqyny bola qalǵan jaǵdaıda jyldam áreket etý úshin kúsh qurylymdarynan ǵana 500-ge jýyq adam, 135 tehnıka ázirlendi», - deıdi SQO TJD bastyǵy Ramıl Kamalov.

Tótenshe jaǵdaıdyń aldyn alý úshin qazirgi ýaqytta eldi mekenderden qar shyǵarylyp jatyr, osy kúnge deıin 500 myń tekshe metrge deıin aq ulpa polıgonǵa jetkizildi.

Sý joldary, sý ótkizgish qubyrlar tazartylyp jatyr.

Aýyr ınjenerlik tehnıka – ekskavator men býldozerlerdi jalǵa alý boıynsha jumys júrgizilip jatyr. Jalpy elý shaqty ekskavator, shamamen sonsha syratyn tehnıkany ýaqytsha paıdalanýǵa kelisim jasalmaqshy.