SQO-da 40-tan astam ınjener, qoryqshylardyń jumys orny bos tur
SQO-nyń orman sharýashylyqtarynda qazirgi ýaqytta 600-ge jýyq adam eńbek etedi. Oblystyq tabıǵı resýrstar jáne tabıǵatty paıdalanýdy retteý basqarmasynyń vedomstvolyq mekemelerinde shtat tolyq bolýy úshin áli 40-tan astam maman qajet.
«Negizinen ınjenerler, orman-sheberleri, orman ınspektorlary sııaqty mamandar jetispeıdi. Óńirde bizge qajet mamandardy eki kásibı oqý orny daıarlaıdy, olar: M.Qozybaev atyndaǵy SQÝ jáne J.Qızatov atyndaǵy joǵary aýyl sharýashylyǵy kolledji.
Mamandardy jumysqa tartý úshin basqarmada keshendi is-sharalar qolǵa alynǵan. Ormanshy kásibiniń mártebesin arttyryp, jastardy orman salasyna tartý úshin oqý oryndarynda jáne ónerkásipte bolashaq mamandarmen kezdesýler ótkizilip turady. Oqý oryndarymen kelisim aıasynda óndiristik tájirıbeler ótkiziledi. Memlekettik mekemelerdiń ókilderi únemi bos oryndar jármeńkesine qatysady», - deıdi SQO tabıǵı resýrstar jáne tabıǵatty paıdalanýdy retteý basqarmasynyń statıstıgi Sáýle Súleımenova.
Orman sharýashylyqtarynyń janynan mektep ormanshylyqtary qurylǵan. Jyl saıyn «Jasyl el» baǵdarlamasy aıasynda 300-den astam jas orman tálimbaqtarynda eńbek etedi, ormandary shirigin aǵashtardan, qoqystan tazartady. Jabaıy ańdarǵa qysta azyq bolýy úshin butaq ázirleıdi.
«Qazir orman sharýashylyqtaryndaǵy mamandardyń orta jasy – 50. Sondyqtan bizge erteń olardyń ornyn basatyn jas mamandar kerek. Jumysqa kelgen jastarǵa qasyna tájirıbeli, eńbek ótili joǵary tálimgerdi bekitemiz. Ol bar bilgenin úıretedi.
Al orman sharýashylyǵynda eńbek etkisi keletin jastarǵa qoıatyn talabymyz – tabıǵatty jaqsy kórý, ormandy kútip-baptaýǵa jaýapkershiliktiń, brakonerlermen kúresý úshin batyldyq pen tabandylyqtyń bolýy», - deıdi Sáýle Súleımenova.
Mamannyń aıtýynsha, qazirgi ýaqytta orman mekemeleri qajetti tehnıkamen de, qondyrǵylarmen de tolyq qamtylǵan.