SQO-da 4 áleýmettik nysan sybaılas jemqorlyq táýekelderiniń kartasyna engen

<p>Petropavlda Sybaılas jemqorlyqqa qarsy kúres kúnine oraı forým ótti. Oblystyq departament bir jyl ishinde atqarylǵan jumysty qorytyndylap, qoǵam dertimen kúreske belsene qatysyp júrgen sala mamandaryn marapattady, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Sybaılas jemqorlyqqa qarsy is-qımyl agenttigi Soltústik Qazaqstan oblysy boıynsha departamentiniń basshysy Ashat Jaqypbekovtyń aıtýynsha, bıyl 65 memlekettik mekemede sybaılas jemqorlyq táýekelderine ishki taldaý júrgizildi, onyń nátıjesi boıynsha olqylyqtardy joıýǵa 467 usynys berildi.

Foto: SQO Sybaılas jemqorlyqpen kúres departamentiniń baspasóz qyzmeti

«Bızneske jol» baǵdarlamasy aıasynda 28 máseleni sheship, úsh myńnan astam kásipkerdiń jumysyn jalǵastyrýyna sep bolǵan.

Antıkorrdyń aralasýynan keıin buǵan deıin kim kóringen paıdalanyp kelgen memlekettik qordaǵy páterler zańdy túrde muqtajdarǵa berile bastady.

Foto:SQO Sybaılas jemqorlyqpen kúres departamentiniń baspasóz qyzmeti

«Respýblıka boıynsha sybaılas jemqorlyq táýekelderiniń kartasyna óńirden 4 áleýmettik nysan kirgen. Olardyń qurylysyna 1,4 mlrd teńge bólingen. Naqtylaı ketsem, Aıyrtaý aýdany Saýmalkól aýylynda jabyq hokkeı korty salynyp jatyr. Tımırıazev aýdany Aqsýat jáne Stepnoe aýylynda eki mádenı-saýyqtyrý ortalyǵynyń qurylysy júrýde. Shal aqyn aýdany Sergeevka qalasynda kóppáterli turǵyn úıdiń qurylysyn, al Petropavl qalasynda jylyjaı kesheniniń qurylysyn jáne oǵan qajet jabdyqtardyń alynýyn baqylaýǵa aldyq. Urlyqqa jol bermeý maqsatynda jurtshylyqtyń qatysýymen qurylys barysyna monıtorıng júrgiziledi», - deıdi Ashat Jaqypbekov.

Foto: SQO Sybaılas jemqorlyqpen kúres departamentiniń baspasóz qyzmeti

Departament basshysynyń aıtýynsha, sybaılas jemqorlyqqa qarsy qyzmettiń mindeti - qylmystyq is qozǵaýǵa deıin jetkizý emes, bıýdjet esebinen salynyp jatqan nysandardyń sapaly turǵyzylyp, belgilengen merzimde tapsyrylýy mańyzdy.