SQO-da 3,7 mln tonna astyq bastyryldy
«Aýyl sharýashylyǵy bıylǵy qıyndyqtarǵa qaramastan turaqty damýda. 10 aıdyń qorytyndysy boıynsha jalpy ónim kólemi 775 mlrd teńgeni qurady. Bıyl soltústikqazaqstandyq dıqandar egin jınaý naýqanyn aýa raıynyń qolaısyz jaǵdaıynda júrgizdi, bul astyqtyń sapasy men kólemine áser etti. Oǵan qaramastan, oblys dıqandary gektarynan 11,1 tsentner ónim aldy. Bul – basqa agrarlyq óńirler arasynda eń joǵarǵy kórsetkish. Nátıjesinde, egin jınaý alqaby eń az bolǵanymen 3,7 mln tonna astyq bastyryldy. Maıly daqyldar 685 myń gektarda jınaldy. Ortasha ónimdiligi 6,7 tsentnerden, 458 myń tonna jınaldy. Jalpy, jaqsy ónim alý úshin barlyq qajetti agrarlyq is-sharalar kesheni júrgizildi», - dedi óńir ákimi Ortalyq kommýnıkatsııalar qyzmetindegi brııngte.
Onyń atap ótýinshe, aýyl turǵyndaryna jyl boıy jumys pen tabys ákeletin mal sharýashylyǵy da erekshe nazarda. On aıda et óndirisi 2 paıyzǵa, sút óndirisi 3,4 paıyzǵa ósti. 589 mıllıon jumyrtqa óndirildi.
«Oblysta jylyna 647,8 myń tonna sút óndiriledi. Bul respýblıkalyq kólemniń 10 paıyzyn quraıdy. Memleket basshysy, halyqty qoljetimdi jáne sapaly azyq-túlikpen qamtamasyz etýdi basty basymdyq retinde belgiledi. Sondyqtan, bizdiń basty mindetimiz – eńbek ónimdiligin ulǵaıtý jáne aýyl sharýashylyǵyn jańǵyrtý. Buǵan ınvestıtsııa tartý arqyly qol jetkizemiz. Respýblıka boıynsha aýyl sharýashylyǵyna eń kóp ınvestıtsııa tartqan bizdiń oblys. Prezıdenttiń et, sút jáne astyqty tereń óńdeý, jylyjaılardy salý jónindegi tapsyrmasyn oryndaý úshin oblysta ınvestıtsııa kólemi 80 mlrd teńgeden asatyn 27 joba iske asýda. Onyń ishinde qus fabrıkalary, qoı fermalary, kókónis qoımasy, jylyjaılar jáne sýarý bar. Osynyń arqasynda, óńir halqynyń qus etine, maýsymaralyq kezeńde kókónisterge qajettiligi 100 paıyzǵa qamtamasyz etiledi, qosymsha sút óndirisi ulǵaıady», - dedi ol.
Óńir basshysy oblysta astyqty tereń óńdeıtin «Bıoopereıshn» zaýyty jumys isteıtindigin aıtty.
«Kásiporyn glıýten, bıdaı krahmalyn, bıoetanol óndiredi. Shıkizatty qaıta óńdeý qýaty jylyna 237 myń tonna, ınvestıtsııa somasy 14 mlrd teńgeni quraıdy», - dedi Gaýez Nurmuhambetov.