SQO-da 3,5 myńǵa jýyq adam maskúnem retinde esepke alynǵan

<p>Soltústik Qazaqstan oblysynda spırttik ishimdikterge qumar 526 adam maskúnem retinde bıyl esepke alyndy, 173 adam májbúrli túrde emdelýge jiberildi, deıdi <a href="https://kaz.inform.kz/" target="_blank" rel="noopener">QazAqparat </a>tilshisi.</p>

SQO polıtsııa departamenti jergilikti polıtsııa qyzmeti basqarmasy bastyǵynyń orynbasary Aleksandr Rozbahtyń aıtýynsha, mas kúıde jasalatyn qylmystardyń aldyn alýǵa arnalǵan jumystar nátıje berdi, kórsetkish 2,1% azaıdy.

Alkogolge qarsy zańnamany buzǵany úshin 9 myńnan astam adam ákimshilik jaýapkershilikke tartyldy. 34 kásipker spırttik ishimdik satý lıtsenzııasynan aıyrylsa, sotqa 32 materıal jiberilip, 28 adam ákimshilik jaýapkershilikke tartyldy.

- Qoǵamdyq orandarda, kóshede mas kúıde júrgen, araq-sharap ishken 8 767 adam anyqtaldy, olardyń 865-i qamaldy, 244-ine ákimshilik aıyppul salyndy.

Ruqsatsyz kásipkerlikpen aınalysqan, tirkeýi bolmaǵan 226 adam anyqtalyp, 198 materıal sotqa jiberildi. 194 adam ákimshilik aıyppul tóledi.

Bıyl zańsyz aınalymnan 7640 lıtr alkogol ónimderi alyndy, - deıdi Aleksandr Rozbah.

Polıtseılerdiń málimetinshe, qazirgi ýaqytta óńirde 3 325 adam maskúnem retinde tirkeýde tur. Olardyń 526-sy esepke bıyl alyndy. Sondaı-aq 173 maskúnem májbúrli túrde emdelýge jiberildi.