SQO-da 33,4 mln teńgege modýldi úsh veterınarııa beketi satyp alynady

PETROPAVL. QazAqparat – Soltústik Qazaqstan oblysynda veterınarııa qyzmetiniń materıaldyq-tehnıkalyq bazasyn nyǵaıtý úshin bıyl 33,4 mln teńge jumsalmaq, dep habarlaıdy QazAqparat tilshisi.

SQO Veterınarııa basqarmasy basshysynyń orynbasary Oljas Bolyspaevtiń aıtýynsha, byltyr óńirdiń veterınarııa qyzmetiniń materıaldyq-tehnıkalyq jaǵdaıyn jaqsartýǵa 85,4 mln teńge bólindi. Oblys bıýdjetinen bólingen 21 mln teńgege modýldi 3 veterınarlyq beket alyndy.

Bıyl osy maqsatqa 33,4 mln teńge bólinbek.

«Bul qarajatqa modýldi 3 veterınarlyq beket alynady. Úı janýarlaryn jappaı óńdeýge bolatyn 93 qondyrǵy alynady. Jospar boıynsha 31 mal qorymy salynbaq.

Jalpy oblysta qazir 351 mal qorymy bar. Jylda jospar jasalady. Sońǵy úsh jylda 41 mal qorymy jańadan salyndy, 37-si jańartyldy jáne 6 ınsınerator alyndy», - deıdi Oljas Bolyspaev.

SQO-da bıyl 5 mln 110 myń úı janýary men qusqa asa qaýipti aýrýlarǵa qarsy profılaktıkalyq ekpe salynady. Bul jumystar 6 aqpannan beri óńirde bastalyp ketti.

«Janýarlarǵa jaýapkershilikpen qaraý týraly» Zańdy iske asyrý aıasynda 600-ge jýyq qańǵybas ıt pen mysyqty chıpteý, vaktsınalaý jáne sterılızatsııa boıynsha is-sharalar júrgizý josparlanyp otyr.

Osy jyly veterınar mamandardyń eńbekaqysy da 50% óspek. Nátıjesinde ortasha eńbekaqy 276 myń teńgege jetpekshi. Budan basqa ótken jyldan beri eki laýazymdyq eńbekaqy mólsherinde saýyqtyrý ótemaqysy tólene bastaǵan.