SQO-da 300-den astam kásipkerdiń quqyǵy qorǵalyp, 1,1 mlrd teńge qaıtaryldy

<p>PETROPAVL. KAZINFORM &ndash; Soltústik Qazaqstan oblysynda biryńǵaı esep kúni ótti. Memlekettik jáne baqylaý-qadaǵalaý organdarynyń ókilderi kásipkerlerge esep berdi. Dástúrli is-shara bıznes pen memlekettiń ózara is-qımylyn jaqsartýdy kózdeıdi.</p>

SQO kásipkerler palatasy baspasóz qyzmetiniń málimetinshe, besinshi ret ótkizilip otyrǵan dástúrli jıynnyń negizgi maqsaty – qyzmetterin qaýipsiz atqarýy úshin kásipkerlik sýbektileriniń quqyqtyq saýattylyǵyn arttyrý. 

Prokýratýra ókilderi kásipkerlerdiń quqyqtaryn qorǵaý jónindegi jumystyń nátıjesimen bólisti. 

«Oblys prokýratýrasy jyl basynan beri bıznes ókilderimen 13 kezdesý ótkizdi, onda kásipkerlerdiń 55 máselesi qaraldy. Olardyń kópshiligi óz sheshimin tapty, qalǵandary baqylaýǵa alyndy jáne olar boıynsha jaýapty memlekettik organdar bekitildi», - dep atap ótti oblys prokýrorynyń aǵa kómekshisi Ǵalymjan Qazybek.

Tasqyn kezinde zardap shekken kásipkerler de prokýrorlar men palata zańgerleriniń únemi nazarynda. Kóktemde 200-den astam bıznes sýbektisi tasqynnan zardap shekti. Sondaı-aq, prokýratýranyń mobıldi toptary jyl basynan bastap kásipkerlerdiń quqyqtarynyń buzylýyna qatysty 85 ótinishti tekserdi. 

«Onyń ishinde 32-si rastaldy, bireýi jalǵan bolyp shyqty, 50-i boıynsha túsindirý jumysy júrgizildi. 39 qadaǵalaý aktisi engizildi, 24 adam jaýapqa tartyldy, 29 zańsyz salyqtyq tekserý joıyldy, kásipkerlerge 1,1 mlrd teńgeden astam qarajat qaıtarldy. Osylaısha 300-den astam kásipkerdiń quqyǵy qorǵaldy» - dedi Ǵalymjan Qazybek.

SQO sybaılas jemqorlyqqa qarsy kúres qyzmetimen birge kásipkerler palatasy Jambyl aýdanynyń «TehStroı – Temir» JShS kásipornynyń máselesin sheshti. Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi kásipkerge qyzmet aqysyn tóleýden bas tartqan. Tótenshe jaǵdaı kezinde kásiporyn oblys ortalyǵynyń aýdandaryn tasqynynan keıin paıda bolǵan qoqystardan tazartty. Alaıda, keıin qalalyq bólim kásipkerge «qyzmet qunyn tómendetemiz» dep, shartty surap alǵan. Buǵan kásipker qarsylyq bildirmegen. 

«Óz mindettemesin oryndaǵannan keıin «TehStroı – Temir» JShS qyzmet aqysyn alý úshin Petropavl qalalyq turǵyn úı-kommýnaldyq sharýashylyǵy bólimine júgindi. Bólim ókilderi onymen shart jasaspaǵanyn, al qoqysty kásipker qaıyrymdylyq negizde shyǵarǵanyn aıtyp, aqy tóleýden bas tartqan. Ótinish SQO kásipkerler palatasynyń kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl jónindegi keńestiń otyrysynda qaraldy. Nátıjesinde iske sybaılas jemqorlyqqa qarsy qyzmet aralasyp, másele oń sheshildi», - dedi SQO kásipkerler palatasy dırektorynyń orynbasary Jeńis Qazıev.

Buǵan deıin SQO-da kásipkerlerdi zańsyz teksergen salyq organdarynyń basshylary jaýapqa tartylǵanyn jazǵan edik.