SQO-da 3 jyl alıment tólemegen boryshker shetelden tabyldy

PETROPAVL. QazAqparat – Soltústik Qazaqstan oblysyndaǵy balasyna 3 jyl boıy alıment tólemeı, halyqaralyq izdeýge jarııalanǵan er adam Ázirbaıjannan tabyldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Ázerbaıjan azamaty 2019 jyldan beri halyqaralyq izdeýde júrgen.

SQO-daǵy balasyna alıment tólemeı qashyp ketken er adamdy mıgratsııalyq qyzmet aldymen kórshi Reseıden izdegen.

Keıin boryshkerdiń óz elinde júrýi múmkin degen aqparat túsisimen, jergilikti polıtseıler Ázerbaıjan Respýblıkasyndaǵy áriptesterimen baılanysqa shyqty.

Nátıjesinde onyń júrgen jeri anyqtaldy. Er adamǵa qatysty jınalǵan materıal jeke sot oryndaýshylaryna berildi.

«Ázirbaıjan azamatyn boryshkerlerdi anyqtaýǵa arnalǵan aktsııa aıasynda taptyq. Bul is-shara 15-17 tamyz aralyǵynda ótken edi. Eki kúnniń ishinde izdeýde júrgen 15 adam tabyldy, onyń ekeýi - týystyq qatynastyń joǵalýyna baılanysty, 3 boryshker bolsa, 10-y - alıment tóleýden qashyp júrgender. Jalpy aktsııa bastalmas buryn bizdiń óndiriste 80 tergeý isi boldy. Onyń 28-i boryshkerge, 31-i alıment tólemegenderge jáne 21-i týystyq qatynasty joǵaltqandarǵa qatysty. Olardy tabýǵa polıtsııanyń búkil qurylymdary jumyldyrylady», - deıdi SQO PD kóshi-qon qyzmeti basqarmasynyń bastyǵy Talǵat Ábilev.