SQO-da 3 jasar balany qudyqtan aman alyp shyqqan jigit marapattaldy
SQO tótenshe jaǵdaılar departamentiniń málimetinshe, oqıǵa 19 qyrkúıek kúni tús mezgilinde bolǵan.
Ýálıhanov aýdany Bıdaıyq aýylynyń turǵyny Erlan Tileýqabylov kóligimen ketip bara jatyp, qudyqqa qulap ketken balany baıqap qalady.
3 jasar Dımashtyń kórer jaryǵy bar eken, búldirshindi jigit qutqaryp qaldy.
«Kólikpen dúkenge bara jatqanmyn. Jolda qudyqtyń ústinde sekirip, oınap turǵan balany kórdim. Bir mezet onyń qaqpaǵy syrǵyp, bala qudyq ishine qulap ketti. Nemeresiniń qasynda ata-ájesi bar edi. Biraq olar qatty shoshyp, ne isterin bilmeı kómek suraı bastady. Dúkenge júgirip kirip, arqan alyp qudyqqa tústim. Bala endi bolmaǵanda sýǵa ketedi eken. Syrtqa alyp shyǵyp, tiri ekenin kórgende qýanyshymda shek bolmady», - deıdi Erlan Tileýqabylov.
Erlannyń bul erligi eskerýsiz qalmady. SQO tótenshe jaǵdaılar departamentiniń saltanatty is-sharasynda jigit «Sýǵa batqandardy qutqarǵany úshin» medalimen marapattaldy.
Vedomstvolyq nagradaǵa ıe bolǵandardyń ishinde erli-zaıypty Denıs pen Dınara Popravkalar da bar.
Olar bıyl 21 qyrkúıek kúni janyp jatqan kórshi páterden eki adamdy, sonyń ishinde 2 jasar sábıdi alyp shyqty. Denıs pen Dınara «Órttegi erligi úshin» medalin keýdege taqty.