SQO-da 29 nysan Ashyq jobasyna qatysyp jatyr

PETROPAVL. QazAqparat – Soltústik Qazaqstan oblysynda Ashyq jobasynyń QR kody 29 nysanǵa berildi. Olardyń 13-i testileý kezeńinen ótip jatyr, dep habarlaıdy QazAqparat tilshisi.

SQO Kásipkerlik jáne ındýstrııalyq-ınnovatsııalyq damý basqarmasynyń málimetinshe, óńirde Ashyq jobasyna fıtnes klýbtar, basseınder, saýnalar, mádenıet jáne qoǵamdyq tamaqtaný nysandary, kompıýter jáne bılıard klýbtary qatysyp jatyr.

Ashyq jobasyna qatysý birqatar artyqshylyq beredi. Eń bastysy - klıentterdiń qaýipsizdigi jáne karantın shekteýi jaǵdaıynda jumys isteýge múmkindiktiń bolýy. Eger óńir «qyzyl aımaqta» bolsa, jobaǵa qatysýshyǵa «sary aımaqqa» sáıkes shekteý krıterııleri, al «sary aımaq» bolsa, «jasyl aımaqqa» tán shekteý qoldanylady», - deıdi SQO Kásipkerlik jáne ındýstrııalyq-ınnovatsııalyq damý basqarmasynyń bólim basshysy Qanat Shamsýtdınov.

Jobaǵa qatysty barlyq aqparatty jergilikti kásipkerler palatasynan alýǵa bolady. Onyń qyzmetkerleri testileý kezeńinde barlyq qatysýshylardy ertip júredi.

Ashyq jobasyna qatysýǵa ótinimder barlyq jańa qatysýshylar úshin InfoKazakhstan.kz saıty arqyly beriledi. Ótinim berýden bastap tizimdi ákimdik saıtynda ornalastyrýǵa deıingi barlyq protsess 9 kúntizbelik kúnnen aspaýy tıis», - deıdi SQO kásipkerler palatasy dırektorynyń orynbasary Jeńis Qazıev.

Búgingi kúni Ashyq jobasyna Petropavlda 29 kásiporyn qosylǵan. Sonyń 13-i testileý kezeńinen ótip jatyr.

Munymen qosa jergilikti atqarýshy organ bıznes sýbektisin baǵdarlamadan shyǵaryp tastaýǵa quqyly. Eger nysan kelýshilerdiń qosymshada tirkelýin 3 kún boıy baqylamasa, tekserýge mobıldi top shyǵady. Onyń qorytyndysyna saı jobaǵa qatysýshy jumys algorıtimin buzǵan jaǵdaıda qosymshamen 2 aptadaı jumys isteı almaıdy.