SQO-da 27 mamyrdan bastap shekteý sharalary kúsheıtiledi

PETROPAVL. QazAqparat – Soltústik Qazaqstan oblysynda epıdemıologııalyq jaǵdaıdyń nasharlaýyna baılanysty 27 mamyrdan bastap birqatar shekteý sharalary engiziledi, dep habarlaıdy QazAqparat tilshisi.

Óńirlerdegi epıdemıologııalyq ahýaldy baǵalaý matrıtsasyna sáıkes SQO 24 mamyrdan bastap «sary» aımaqta. Osyǵan oraı búgin bas memlekettik sanıtar dárigeriniń jańa qaýlysy shyqty. Engizilgen ózgeristermen Áset Jumataev óńirlik kommýnıkatsııalar qyzmetiniń brıfınginde tanystyrdy. 27 mamyrdan bastap oblysta birqatar nysannyń jumysy shektelmek. ıAǵnı:

1) bılıard, boýlıng, balalardyń oıyn alańdary men jabyq nysandardaǵy attraktsıondar, banket zaldary men kompıýter klýbtary, akvapark jumysyn ýaqytsha toqtatady;

2) otbasylyq is-sharalardy, eske alý keshterin ótkizýge tyıym salynady;

3) dinı nysandardyń ishinde ujymdyq is-sharalardy ótkizýge ruqsat joq. Taza aýada maska taǵyp, 4 metr ara qashyqtyqty saqtap qana jınalýǵa bolady;

4) mádenıet nysandarynda jeke, toptyq daıyndyqtardy 30 adamnan asyrmaı ǵana ótkizýge ruqsat;

5) mektepke deıingi bilim mekemelerinde bala sanyn 25-ten asyrmaı kezekshi toptar ǵana jumys isteıdi. Balalardyń túzetý kabınetteri, túrli bilim ortalyqtary aldyn ala jazylý boıynsha adam sanyn 15-ten asyrmaı ǵana jumys isteıdi;

6) jeksenbi kúni jeke kabınalary bar monshalar men saýnalardyń jumysy shekteledi;

7) sporttyq is-sharalar adam sanyn 15 %-dan, teatr, kınoteatrlar, kontsert zaldary syıymdylyǵyna baılanysty kórermen sanyn 20 %-dan asyrmaı ǵana jumys isteıdi;

8) qyzmetkerlerdiń 50 %-y qashyqtan jumys isteýge kóshiriledi. COVID-19-ǵa qarsy vaktsınatsııadan ótken uıymdar, keńselerge bul talaptyń qatysy joq.

9) qoǵamdyq tamaqtaný oryndarynyń jumys ýaqyty saǵat 24.00-ge deıin qysqarady;

«Ashyq» jobasyna qatysýshylarǵa bul shekteýlerdiń qatysy joq. Olar «jasyl» aımaqtyń talaptary boıynsha jumystaryn jalǵastyra bermek.