SQO-da 26 memorgan satyp alý baǵasyn 300 mln teńgege negizsiz kóterip jibergen

PETROPAVL. QazAqparat – Soltústik Qazaqstan oblysynda sybaılas jemqorlyqqa qarsy qyzmettiń aralasýymen 300 mln teńgege jýyq memleket qarjysy únemdeldi, dep habarlaıdy QazAqparat tilshisi.

SQO Sybaılas jemqorlyqqa qarsy qyzmet jetekshisiniń birinshi orynbasary Nurlan Jahınniń aıtýynsha, agenttik qyzmetindegi basym baǵyttardyń biri - kvazımemlekettik jáne korporatıvtik sektorda sybaılas jemqorlyqqa qarsy saıasatty iske asyrý.

Sybaılas jemqorlyqqa qarsy komplaens-qyzmetter osyndaı jumystyń quraly retinde aıqyndaldy.

«Oblys aýmaǵynda komplaens-qyzmet ınstıtýty taratý jáne bankrottyq rásimderden ótip jatqan kompanııalardy esepke almaǵanda, kvazımemlekettik sektordyń barlyq 190 sýbektisin qamtydy. Olarmen komplaens-ofıtserler óz aralarynda sybaılas jemqorlyqqa qarsy is-qımyl boıynsha is-sharalar josparyn ázirleý boıynsha apta saıyn kezdesýler uıymdastyrdy», - deıdi Nurlan Jahın.

Bıýdjetti josparlaý kezeńinde onyń orynsyz jumsalý faktilerine jol bermeý maqsatynda kásipkerler palatasymen yntymaqtastyq ornatylǵan.

«Osylaısha, «Satyp alýdyń biryńǵaı terezesi» portalyna jasalǵan monıtorıng qorytyndysy boıynsha josparlanǵan satyp alý baǵalaryn kóterýdiń 31 faktisi anyqtaldy. Olar boıynsha 26 memlekettik organ baǵany tómendetý boıynsha sharalar qabyldady. Nátıjesinde satyp alý baǵasyn 292,8 mln teńgege tómendetý múmkin boldy», - deıdi SQO Sybaılas jemqorlyqqa qarsy qyzmet jetekshisiniń birinshi orynbasary Nurlan Jahın.