SQO-da 22 mektepte sport zaly, taǵy birneshe mektepte ashana joq
SQO óńirlik kommýnıkatsııalar qyzmetinde «SQO bilim berý uıymdarynyń jańa oqý jylyna daıyndyǵy týraly» brıfıng ótti.
«QR Oqý-aǵartý mınıstrligi Bilim salasynda sapany qamtamasyz etý komıtetiniń SQO bilim salasynda sapany qamtamasyz etý departamenti» MM basshysy Alena Malgaeva monıtorıng qorytyndysyn jarııalady.
«Oqý-aǵartý mınıstrligi jańa oqý jylyna daıyndyq boıynsha 10-24 shilde aralyǵynda óńirdiń jalpy bilim beretin mektepterine kezekti monıtorıng júrgizdi. Onyń barysynda bilim berý uıymdaryndaǵy ınternet jelisiniń jyldamdyǵyna, kúrdeli jáne aǵymdaǵy jóndeý jumysarynyń ótkizilýine, qaýipsizdik sharalaryna, sonyń ishinde beınebaqylaý júıesiniń, lıtsenzııalanǵan kúzet, týrnıket, dabyl túımesiniń bolýyn, jyly sanıtarlyq toraptardyń, sport zaldarynyń, ashanalardyń, pándik - hımııa, fızıka, bıologııa kabınetteriniń bolýyn nazarǵa aldy», - deıdi Alena Malgaeva.
Departament basshysynyń aıtýynsha, bilim berý uıymdarynda qaýipsizdik máselesi jaqsy sheshimin tapqan. Oqýshy sany kóp mektepterdiń barlyǵy, al bul 64% - jedel basqarý ortalyǵyna qosylǵan. Oblystyń barlyq mektepterinde jyly sanıtarlyq torap bar, oqýlyqpen de tolyq qamtylǵan.
«Mektepter ınternetpen 100% qamtamasyz etilgenine qaramastan, 95 mektepte onyń jyldamdyǵy is júzinde 4 mbıt/sek aspaıdy, 156 mektepte 4-ten 10 mbıt/sek-ke deıingi jyldamdyq bar, tek 40% - y ǵana 10 Mbıt/sek jyldamdyqty ınternetpen jabdyqtalǵan.
Oblystyń 73 mektebinde jumys istemeıtin ınteraktıvti taqtalardyń úlesi 50% - dan asady. Mektepterdiń 41% fızıka, mektepterdiń 53% hımııa jáne bıologııa kabınetteri joq», - deıdi Alena Malgaeva.
Mamannyń aıtýynsha, oblystyń 5 orta jáne 17 negizgi mektebinde sport zal joq.
«Bıyldan bastap bastaýysh synyp oqýshylary tegin ystyq tamaqpen qamtylýy kerek. Soǵan qaramastan, Petropavldyń 4 tolyq jınaqtalǵan mektebinde jáne aýdandardyń birqatar bastaýysh mektepterinde ashana joq», - dedi departament basshysy.