SQO-da 21 myń paı ıesiniń jerin qaıtarý boıynsha jumys bastaldy

PETROPAVL. QazAqparat – Soltústik Qazaqstan oblysynyń prokýratýrasy ótken jyldy qorytyndylap, osy jylǵa mindetterdi aıqyndady. Sonyń biri jer úlesinen zańsyz aıyrylǵan paı ıeleriniń quqyǵyn qorǵaý, dep habarlaıdy QazAqparat tilshisi.

SQO prokýratýrasynyń alqa otyrysynda belgili bolǵandaı, 2020 jyldan bastap jer zańnamasy salasynda júrgizilip jatqan júıeli jumys nátıjesinde aýdany 124 myń ga bolatyn 232 jer ýchaskesi qaıtaryldy. Jaıylymdyq jerler 124 myń ga artty. 26 problemalyq kásiporyndaǵy jalpy aýmaǵy 257 myń ga bolatyn 11 myńnan astam paı ıesiniń quqyǵy qorǵaldy.

Paıshylardyń qatysýymen bolatyn jalpy jınalystardyń hattamalaryn qoldan jasaý, alaıaqtyq, JShS-tiń basshylarynyń ókilettikterin qasaqana asyra paıdalaný faktileri boıynsha sotqa deıingi 22 tergep-tekserý bastaldy.

Paıshylardyń óz quqyqtary men zańdy múddelerin sotqa deıingi tártippen jáne sotta óz betinshe qorǵaýy úshin is-qımyl algorıtmderi ázirlendi. Paıshylarǵa talap aryzdardy daıyndaýda praktıkalyq kómek kórsetilip jatyr.

«Jarqyn-SK» JShS qatysýshylary – 4 myń paı ıesiniń quqyǵyn qorǵaý maqsatynda prokýror atalǵan seriktestik pen «Agrarlyq kredıttik korporatsııa» AQ arasynda jasalǵan 14 kepil sharttyń kúshin joıý týraly talap aryz berdi. Seriktestiktiń basshysy 2017 jyly qujattardy qoldan jasap, paıshylardyń jerin kepilge qoıyp, 600 mln teńgeni qaltasyna basqan. Ekonomıkalyq sottyń sheshimimenótken jyldyń sońynda prokýrordyń 14 kepil shartty jaramsyz dep taný týraly talaby tolyǵymen qanaǵattandyryldy.

«Jarqyn SK» JShS dırektory men burynǵy dırektoryna qatysty alaıaqtyq faktisi boıynsha sotqa deıingi tergep-tekserý júrgizildi. Qorytyndysy boıynsha qylmystyq ister sotqa joldandy. Sot úkimimen olarǵa bas bostandyǵynan aıyrý jazasy qoldanyldy.

Qazirgi ýaqytta «Alıbı» holdıngi kásiporyndary tobyna qatysty ujymdyq ótinish negizinde sotqa deıingi tergeý júrip jatyr. Holdıng basshylyǵy paıshylardyń jer ýchaskelerin kepilge qoıý arqyly 4,7 mlrd teńge somasynda bankterden kredıttik qaryz alǵan. Keltirilgen shyǵyn mólsherin jáne aqshalaı qarajattyń túpkilikti benefıtsıaryn anyqtaý úshin aýdıt júrgizilýde.

Sondaı-aq oblys prokýrorlary búginde jerlerinen aıyrylǵan 21 myńnan astam paı ıelenýshileriniń quqyqtaryn qorǵaý maqsatynda jumysty qolǵa aldy.