SQO-da 2020 jylǵy qus tumaýynan keıin fabrıkalar halyqqa 960 mln teńge ótemaqy tóledi
Bul týraly búgin Úkimet otyrysynda Premer-Mınıstr Álıhan Smaıylovtyń saýalyna jaýap bergen óńir basshysy Qumar Aqsaqalov aıtty, dep habarlaıdy QazAqparat tilshisi.
«Soltústik Qazaqstanda qus fabrıkalary ótkende qus tumaýynan qatty zardap shekti. Osy jyly óndiris kólemi qalpyna keltirildi me?», - dep suraǵan edi Premer-Mınıstr óńir ákiminen.
Qumar Aqsaqalovtyń dereginshe, 2020 jyldyń kúzinde joǵary potagendi qus tumaýynyń órshýine baılanysty 3 qus fabrıkasynda qus basy tolyǵymen joıylǵan.
«Qus fabrıkalary halyqqa 960 mln teńge ótemaqy tóledi. Qazir qus tumaýynan zardap shekken 2 qus fabrıkasy jaǵdaıdy tolyq qalpyna keltirip, shtattyq rejımde jumys istep jatyr. 4 aıda byltyrǵy kezeńmen salystyrǵanda 2,6 ese ósimmen 188 mln dana jumyrtqa óndirildi. 2022 jyldyń qorytyndysyn 126 paıyz ósimmen aıaqtaımyz degen josparymyz bar», - dedi oblys basshysy.
2020 jyldyń qazan aıynda Reseıdiń elimizben shekaralas óńirlerinde qus tumaýy shyǵyp, ol Soltústik Qazaqstan oblysyna da taraǵan edi.
Ótken jyly da Tımırıazev aýdanynyń Drýjba eldi mekeninde, M.Jumabaev aýdynyndaǵy Lebıaje eldi mekeninde qus tumaýy tirkelgen bolatyn.