SQO-da 200 adam maskúnemdikten májbúrli túrde emdelýge jiberildi

PETROPAVL. QazAqparat – Soltústik Qazaqstan oblysynda byltyr 200 adam maskúnemdikten májbúrli emdelýge jiberilse, sonyń 177-si qatarǵa qosyldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, ýchaskelik polıtsııa ınspektorlarynyń aldynda turǵan negizgi mindetterdiń biri – maskúnemdikpen kúresip, adamnyń qalypty ómirge oralýyna kómektesý. Osylaısha, qylmys pen quqyq buzýshylyqtyń aldyn alý.

Byltyr SQO-da narkologııalyq ortalyqqa májbúrlep emdelýge 200 adam jiberilip, onyń 177-si em alyp shyqty. Olardyń árqaısysy qazir ýchaskelik polıtsııa ınspektorynyń nazarynda: jaman ádetke oralmaıtynyna kóz jetkizip, qajet bolǵan jaǵdaıda qoldap, kómek kórsetedi.

Aqqaıyń aýdanyndaǵy aýyldardyń birinde ýchaskelik polıtsııa ınspektorynyń kómekshisi Almat Galeev úı-úıdi aralaý kezinde ótken jyly emdelip shyqqan eki aǵaıyndyny da tekserdi. Aýyl turǵyndary narkologııalyq ortalyqta bolǵan kezde úıleri eskirip, turýǵa jaramaı qalǵan eken. Aýdanda týǵan-týystary bolmaǵandyqtan, jerqoımany panalaǵan. Aýyldyq okrýg ákiminiń qoldaýymen polıtseıler olardy aýrýhanaǵa jetkizip, óz qarajattaryna tamaq pen kıim alyp berdi. Emdelýden keıin aǵaıyndylar Petropavldaǵy áleýmettik beıimdeý ortalyǵyna jetkizilmek.

«Ýchaskelik polıtsııa ınspektory turǵyndardyń ómirinen habardar bolýy qajet. Bul úshin qyzmet kórsetiletin ýchaskede esepte turǵan tulǵalar, kómek qolyn qajet etetin áleýmettik osal toptar kúndelikti tekseriledi. Ýchaskelik polıtsııa ınspektory aryzdardy qarastyryp qana qoımaı, olardy ýaqtyly sheshý úshin problemalyq jaǵdaılardy aldyn ala anyqtaýy tıis», - deıdi Aqqaıyń aýdandyq polıtsııa bóliminiń bastyǵy Rýslan Saparov.