SQO-da 2,5 myńǵa jýyq jasóspirim Pfizer vaktsınasyn aldy

PETROPAVL. QazAqparat – Soltústik Qazaqstan oblysynda koronavırýsty juqtyrǵandar qatary azaıdy, ótken táýlikte 60 adamnan qaýipti ınfektsııa anyqtaldy, dep habarlaıdy QazAqparat tilshisi.

SQO densaýlyq saqtaý basqarmasy baspasóz qyzmetiniń málimetinshe, ótken táýlikte 422 adam PTR test tapsyrsa, sonyń 60-ynda koronavırýs anyqtaldy. Jalpy óńirde aýyrǵandar sany 33 348-ge jetti. Olardyń 29 373-i jazyldy. Qazir emdeý mekemelerinde 453 adam jatyr. Statsıonarlardyń 27% ǵana toly. Taǵy da 17 adam karantınde, 37 adam jansaqtaý bólimshesinde jatyr. Ótken táýlikte 2 adam qaıtys boldy.

«Búginge deıin koronovırýs óńirde 385 adam qaıtys boldy. Statsıonarlarda em qabyldap jatqandardyń 65% - jasy 60-tan asqan egde adamdar. Dertten kóz jumǵandardyń 70% de qarııalar. Ári olardyń basym bóligi vaktsına almaǵan», - deıdi oblystyq densaýlyq saqtaý basqarmasy basshysynyń orynbasary Qumar Kúsemisov.

Búginge deıin SQO-da 246 myńnan astam adam vaktsınatsııa kýrsynan ótti. Al Pfizer vaktsınasyn 3 myńnan astam adam aldy, onyń 2,5 myńǵa jýyǵy – jasóspirim.