SQO-da 170 stýdent Arızona ýnıversıtetiniń baǵdarlamasymen bilim alady
Bul týraly óńir ákimi Qumar Aqsaqalov Prezıdentpen kezdesýden keıin bergen suhbatynda aıtty.
«Memleket basshysynyń aldynda Soltústik Qazaqstan oblysynyń áleýmettik-ekonomıkalyq damýy týraly baıandama jasadym. Jalpy oblystyń ekonomıka salasynda ósim qamtamasyz etildi. Dál osyndaı ósim jyldyń aıaǵyna deıin qamtamasyz etiledi. Byltyrǵymen salystyrǵanda jalaqy 22 protsent, zeınetaqy qory 25,5 protsent, salyq túsimi 36 protsent ósti», - dedi aımaq basshysy.
Aıtýynsha, Soltústik Qazaqstan – óńirler arasynda eń kóp taýarly sút fermalary salynyp jatqan oblys.
«Byltyr 10 fermanyń qurylysy bitse, bul jyldyń aıaǵyna deıin 8 jańa taýarly sút fermasyn iske qosyp, jumys istetkizemiz. Bıyl qosymsha 9 fermanyń qurylysy bastalyp, kelesi jyly bitýi kerek.
Ónerkásip salasynda da ósim bar. Búkil zaýyttar shtattyq rejımde jumys istep tur. Prezıdentke halyqty sýmen, jolmen qamtamasyz etý kórsetkishteri týraly da málimet berdim. Jyldyń aıaǵyna deıin óńirdiń taza aýyz sýmen qamtamasyz etilýi 84 protsentke, jolmen qamtamasyz etý 81 protsetken deıin jetedi.
Jergilikti memlekettik ýnıversıtet pen AQSh-tyń Arızona ýnıversıtetiniń qarym-qatynasy týraly da aqparat berildi. Bıyl bul joba da bastaldy. Birinshi kýrsqa 170 stýdent qabyldandy. Ol stýdentter halyqaralyq baǵdarlamamen oqıdy», - dedi Qumar Aqsaqalov.
Aıta keteıik, búgin Memleket basshysy Soltústik Qazaqstan oblysynyń ákimin qabyldady.