SQO-da 16 jasar jasóspirimge izdeý jarııalandy

PETROPAVL. QazAqparat – Soltústik Qazaqstan oblysynda 12 saǵat buryn eshkimdi eskertpesten demalys ornynan ketip qalǵan 16 jasar jasóspirimge izdeý jarııalandy, dep habarlaıdy QazAqparat tilshisi.

SQO Aıyrtaý aýdanynda 16 jastaǵy Nıkolaı Veberge izdeý jarııalandy.

Jasóspirim búgin tańǵy saǵat 6.00 shamasynda Imantaý eldi mekeninde ornalasqan «Aıbek» demalys bazasynan eshkimdi eskertpesten belgisiz jaqqa ketken.

Balany izdeýge volonterler de atsalysyp, fotosy men ol týraly málimetti áleýmettik jelide taratty. 12 saǵattan beri jasóspirim jaıynda esh derek joq.

Nıkolaıdyń boıy 170-175 sm shamasynda, aryqsha kelgen, shashy qońyr, qysqa. Ústinde túrli tústi qysqa shalbar, qara jeıde jáne qara aıaq kım bolǵan.

Balany kórgender 8 777 307 99 65, 8 926 626 64 33 jáne 102 nómirine habarlasa alady.

Buǵan deıin izdeý jarııalanǵan Sergeı Bagınskııdiń denesi tabyldy. Esterińizge salaıyq, Taıynsha aýdany, Kellerovka eldi mekeniniń 58 jastaǵy turǵyny mamyr aıynyń basynda úıinen ketip, qaıtyp oralmaǵan edi.

Al iz-tússiz ketken túrkistandyq tórt jasóspirim Petropavldan aman-esen tabyldy. Olar eshkimge eskertpesten úıden ketip, el aralamaq bolǵan.

16 jastaǵy jasóspirimderdiń bireýin polıtsııa Pestroe kóliniń mańynan tapty.

Keıin qalǵan úsheýin de anyqtap, kámeletke tolmaǵandardy beıimdeý ortalyǵyna ýaqytsha ornalastyrdy.