SQO-da 16 telefondy kólikke jasyryp, túrmege kirgizbek bolǵandar ustaldy

PETROPAVL. QazAqparat – Soltústik Qazaqstan oblysynda Qylmystyq-atqarý júıesi departamentiniń jedel bólim qyzmetkerleri №51 mekeme aýmaǵyna tyıym salynǵan zattardy ótkizbek bolǵan kólikti anyqtady, dep habarlaıdy QazAqparat tilshisi.

SQO boıynsha QAJD baspasóz qyzmetiniń málimetinshe, 22 mamyr kúni jedel aqparat túsip, №51 mekemeniń aýmaǵyna tyıym salynǵan zattar kirgiziletini habarlanǵan. Osy mekemeniń jedel bólimi dereý iske kirisip, aýmaqqa kiretin Mercedes-Benz markaly jeńil avtokólikti teksergen. Nátıjesinde mashınadan 16 uıaly telefon, onyń 9-y ınternetke qosylǵan, 2 wi-fi roýteri, 5 qýattaǵysh, 4 jup qulaqqap, 1 flesh-karta jáne 11 SIM - karta tabylyp, tárkilendi. Tyıym salynǵan bul zattar 5 polıetılen oramaǵa oralyp, kóliktiń aldyńǵy paneliniń ishki jaǵyna jáne artqy oń jaq esiktiń qaptamasyna jasyrylǵan eken.

«Mekeme aýmaǵynda jeke kásipkerdiń tehnıkalyq qyzmet kórsetý ortalyǵy ornalasqan. Avtokólik osy ortalyqta jóndelýi tıis bolǵan. Avtomobıl júrgizýshisine qatysty QR ÁQBtK-niń «Qylmystyq-atqarý júıesi mekemelerinde, arnaıy mekemelerde ustalatyn adamdarǵa tyıym salynǵan zattardy, buıymdar men zattardy berý» 481-baby boıynsha ákimshilik hattama jasaldy.

Qazirgi ýaqytta tyıym salynǵan zattardy jetkizý arnasyn uıymdastyrǵan adamdardy anyqtaý boıynsha jedel-izdestirý sharalary júrgizilip jatyr», - delingen habarlamada.