SQO-da 16 bilim berý uıymynyń 14-i memlekettik attestatsııadan óte almady
Óńirlik kommýnıkatsııalar qyzmetinde SQO Bilim salasynda sapany qamtamasyz etý departamenti baspasóz máslıhatyn ótkizdi. Bilim sapasyn syrttaı baǵalaý bóliminiń bas mamany Kúlzaǵıra Nurtaevanyń aıtýynsha, bıyl 86 oqý ornynda memlekettik attestattaý ótkizý josparlanǵan. Sonyń 10-y mektepke deıingi tárbıe men oqytý uıymy, 66-y bastaýysh, negizgi orta jáne jalpy orta bilim berý uıymy, 10-y tehnıkalyq jáne kásiptik bilim berý kolledjderi.
Bıylǵy birinshi toqsanda 16 bilim berý uıymynda memlekettik attestattaý júrgizildi, alaıda nátıjesi kóńil kónshitpeıdi. Máselen 11 mekteptiń tek bireýi ǵana talapqa saı bolyp shyqqan. Keıin taǵy tórteýine «attestatsııadan ótti» degen sheshim shyǵaryldy.
«Bul uıymdar memlekettik standart boıynsha jumys isteýleri qajet. Eń jıi kezdesetin qatelikter: oqý kestesiniń jumys jáne úlgilik oqý josparlaryna sáıkes kelmeýi, mektepke deıingi uıymdardaǵy aptalyq oqý júktemesi kóleminiń memlekettik bilim berý standartynyń bilim berý men oqytý tiline qoıylatyn talaptarǵa sáıkes kelmeýi, oqýshylardyń damýyn baqylaýda talaptardyń oryndalmaýy, oqý sabaqtarynyń kestesindegi, onyń ishinde Kundelik elektrondy jýrnalyndaǵy pánderdiń ataýlary men tıptik oqý josparyndaǵy olardyń ataýlarynyń sáıkes kelmeýi jáne taǵy basqalary.
Budan basqa beınebaqylaý júıeleriniń beınetúsirilimderin Jedel basqarý ortalyǵyna nemese aýmaqtyq polıtsııa organdarynyń kezekshi bólimshelerine jiberý múmkindiginiń bolmaýy, bastaýysh synyptarda jeke paıdalanýǵa arnalǵan jabdyqtalǵan shkaftardyń joqtyǵy esepke alyndy.
Muny jergilikti atqarýshy organnyń kómegimen sheshý qajet, óıtkeni bıýdjetten qarajat bólinýi tıis», - deıdi Kúlzaǵıra Nurtaeva.
Bilim berý uıymdarynyń memlekettik attestatsııadan ótpeýinen osy mektepterdiń túlekterine memlekettik bilim týraly qujat berilmeýi múmkin.