SQO-da 15 qyrkúıekten bastap tumaýǵa qarsy vaktsınatsııa bastalady
SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, oblysqa bıyl da tumaýǵa qarsy qoldanylǵan reseılik ınaktıvtelgen «Grıppol-Plıýs» vaktsınasy jetkizildi.
Vaktsınada aldaǵy maýsymǵa qarsy shtammdar bar.
Bıyl tumaýǵa qarsy ekpemen respýblıka halqynyń shamamen 11% -yn qamtý josparlanǵan, DDU usynǵan kórsetkish keminde 10 %.
«Tumaýǵa qarsy profılaktıkalyq egý táýekel toptaryna jatatyndarǵa tegin jasalady. Olar: medıtsına mamandary, medıtsınalyq uıymda dıspanserlik esepte turǵan balalar, balalar úıiniń, náresteler úıiniń balalary, qarttar úıiniń turǵyndary, sozylmaly aýrýlarmen esepte turǵan epıdemıologııalyq kórsetkishterge baılanysty juqtyrý qaýpi joǵary adamdar. Sonymen qatar, vaktsınatsııa jumys berýshiler men azamattardyń jeke qarajaty esebinen júrgiziledi. Tumaýǵa qarsy aqyly ekpe turǵylyqty jeri boıynsha emhanalardyń ekpe kabınetterinde júrgiziledi», - deıdi Áset Jumataev.
Qazaqstanda reseılik «Grıppol-Plıýs» vaktsınasynan basqa taǵy úsh óndirýshiniń tumaýǵa qarsy vaktsınalary tirkeldi. Olar - «Vaksıgrıp Tetra» (Frantsııa), «Inflıývak» (Nıderlandy) jáne Sınovak Bıotek (Qytaı).
«Maýsymdyq tumaýda dene qyzýy kenetten kóterilip, jótel, bas aýrýy, bulshyqetter men býyndardyń aýyrýy, qatty álsizdik, tamaqtyń aýrýy paıda bolady, murynnan aǵady. Jótel 2 apta nemese odan da kóp ýaqytqa sozylýy múmkin. Kóptegen adamdarda sımptomdary medıtsınalyq kómeksiz bir apta ishinde joıylady. Biraq táýekel toptaryna jatatyn adamdarda tumaý aýyr ótip, tipti ólimge ákelýi múmkin», - deıdi Áset Jumataev.
Tumaý men jedel-respıratorlyq vırýstyq ınfektsııanyń aldyn alýdyń joldary - maskany durys kııý, áleýmettik qashyqtyqty saqtaý, adamdar kóp jınalatyn jerlerge barmaý, qoldy únemi jýý.
SQO densaýlyq saqtaý basqarmasynyń málimetinshe, óńirge tumaýǵa qarsy 60 myń doza vaktsına tústi. Ol emdeý mekemeleri arasynda bólinip jatyr.
Ekpeni jergilikti emhanalardyń egý kabınetterinde qoıǵyzýǵa bolady.