SQO-da 15 adam sheteldikterdiń eńbegin zańsyz paıdalanǵan

PETROPAVL. QazAqparat – Soltústik Qazaqstan oblysynda «Zańsyz kelýshi» jedel-aldyn alý is-sharasy ótti. Nátıjesinde, óńirdiń birneshe aýdanynda zańsyz jumys istegen sheteldikter anyqtaldy. Olardy jumysqa tartqandar da jazasyz qalmady, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 19-25 maýsym aralyǵynda óńir polıtseıleri «Zańsyz kelýshi» jedel-profılaktıkalyq is-sharasy aıasynda jumys istedi.

Kóshi-qon qyzmetiniń mamandary ýchaskelik ınspektorlarmen jáne ózge bólimshelermen birlesip, aýyl sharýashylyqtaryna, qurylys jáne saýda nysandaryna reıdter júrgizdi.

Nátıjesinde Esil aýdanynda medıtsınalyq mekemeni jumysqa ornalasýǵa ruqsatsyz jóndep jatqan Ózbekstannyń 6 azamatynan turatyn brıgada anyqtaldy.

Al Shal aqyn aýdanynda mektepti jóndeýge Tájikstannyń 10 turǵyny tartylǵan. Olar da zańsyz jumys istegen.

Eki jaǵdaıda da QR Ákimshilik quqyq buzý týraly kodeksiniń 517-babynyń 5-bóligi boıynsha materıaldar jınaldy.

Zańdy aınalyp ótý maqsatymen sheteldik jumys kúshin paıdalanǵan merdigerler de ákimshilik jaýapkershilikke tartyldy.

«SQO-da 7 kún ishinde el aýmaǵynda bolý erejelerin buzǵany úshin 212 sheteldik jazalandy. Sondaı-aq, óńirdiń 80 turǵyny úsh kúndik merzimde organdarǵa shetelden kelgen qonaqtary jaıynda habarlamaǵany nemese elde bolý merzimi ótken sheteldikterdiń ýaqtyly ketýi boıynsha sharalar qabyldamaǵany úshin jaýapqa tartyldy. Sheteldik jumys kúshin zańsyz paıdalanǵany úshin 15 jumys berýshi aıyppul tóledi. Adamdardan zańnama talaptaryn qatań saqtaýdy suraımyz. Reıd jalǵasady», - deıdi SQO PD kóshi-qon qyzmeti basqarmasynyń bastyǵy Talǵat Ábilov.