SQO-da 14 myńnan astam adam «Birgemiz» qorynan qarjylaı kómek aldy

PETROPAVL. QazAqparat – Soltústik Qazaqstan oblysynda «Birgemiz» Qoǵamdyq Qory arqyly shaǵyn qalalar men jeti aýdannyń turǵyndaryna qosymsha 160 mln teńge shamasynda materıaldyq kómek kórsetildi, dep habarlaıdy QazAqparat tilshisi.

«Nur Otan» partııasy SQOF baspasóz qyzmetiniń málimetinshe, Býlaev, Mamlıýtka, Sergeevka, Taıynsha qalalarynyń jáne jeti aýdannyń turmysy tómen 3192 turǵynyna 159 mln 600 myń teńge tólendi. Elbasy Nursultan Nazarbaevtyń tapsyrmasymen jaqynda 50 myń teńge mólsherinde bir rettik tólem jasaýdyń úshinshi kezeńi uıymdastyrylmaq.

Mamandardyń aıtýynsha, Qor tólem jasaýda memlekettik organdar bergen resmı málimetke súıenedi. Tizimdi jergilikti jumyspen qamtý jáne áleýmettik baǵdarlamalar bólimderi beredi.

Aktsııanyń birinshi jáne ekinshi kezeńinde tek Petropavl qalasynan ǵana 11 myń otbasy bir rettik tólem - 50 myń teńgeni aldy. Bul aqsha ekinshi deńgeıli bankter arqyly alýshynyń esepshotyna túsedi. Materıaldyq kómek jetken kezde, telefonǵa: «Sizdiń shotyńyzǵa «Birgemiz» qorynan 50 000 teńge kelip tústi. #BizBirgemiz, Elbasy, «Nur Otan» degen habarlama túsedi.

Budan basqa SQO-da «Jas Otan» jastar qanatynyń aıasynda 200-den astam volonter 1700 otbasyǵa azyq-túlik qorjyndaryn, medıtsınalyq maskalar men turmysqa birinshi qajettiliktegi zattardy taratty.