SQO-da 13 aýyldyq okrýg, 33 aýyl, 300-ge jýyq kósheniń ataýy ıdeologııalyq turǵyda eskirgen

PETROPAVL. QazAqparat – Soltústik Qazaqstan oblysynda onomastıkalyq komıssııanyń qaraýyna jyl basynan beri 32 kósheniń ataýyn ózgertýge qatysty qujattar tústi, dep habarlaıdy QazAqparat tilshisi.

Onomastıka salasynda atqarylǵan jumystar jaıynda «Qazaq tili» qoǵamy oblystyq fılıalynyń keńeıtilgen alqa otyrysynda mádenıet, tilderdi damytý jáne arhıv isi basqarmasy basshysynyń mindetin atqarýshy Nurlan Jamantaev aıtty.

Óńirde ıdeologııalyq turǵydan eskirgen, totalıtarlyq sıpataǵy jáne qaıtalanatyn ataýlardy tarıhı jáne dástúrli ataýlarmen ózgertý maqsatynda jumystar júrgizilip jatyr. Máselen byltyr Mamlıýt aýdany Lenın aýyldyq okrýgi – Bıke aýyldyq okrýgi, Aqjar aýdany Novosel aýyldyq okrýgi – Úlken Qaraoı aýyldyq okrýgi jáne 3 aýyl Mamlıýt aýdany Lenın aýyly – Bıke aýyly, Aqjar aýdany Kommýnızm aýyly – Baımyrza aýyly, Kıevskoe aýyly – Kishi Qaraoı aýyly dep ózgerdi.

Sonymen qatar 200-den astam kósheni qaıta ataý boıynsha jumys júrgizilgen.

«Byltyr respýblıkalyq onomastıka komıssııasynyń otyrysynda oblys ortalyǵyndaǵy №25 jalpy bilim beretin orta mektepke - Álıhan Bókeıhannyń, №2 orta mektepke - Smaǵul Sádýaqasulynyń, №9 orta mektepke - Ahmet Baıtursynulynyń, Ulttyq sport túrlerinen oblystyq balalar men jasóspirimder sport mektebine - Qajymuqannyń esimin berý boıynsha usynystar qabyldandy. Qazirgi tańda joǵaryda atalǵan bilim ordalaryna tulǵalardyń esimin berý boıynsha QR Úkimeti qaýlysynyń jobasy Premer-Mınıstrdiń Keńsesine engizildi», - deıdi Nurlan Jamantaev.

Jyl basynan Aıyrtaý, Shal aqyn, Ýálıhanov aýdandarynda 20-ǵa jýyq kóshege jańa ataý berý maqsatynda jergilikti turǵyndarmen jınalystar ótken.

«Bıyl oblystyq onomastıka komıssııasynyń qaraýyna barlyǵy 32 kósheni, ıaǵnı Esil aýdanynda – 12, Aqjar aýdanynda – 5, Jambyl aýdanynda – 8, Aıyrtaý aýdanynda – 7 kósheni qaıta ataý, sondaı-aq Novonıkolsk orta mektebine Gennadıı Zenchenkonyń esimin berý boıynsha qujattar kelip tústi.

Budan basqa medıtsınalyq kolledjge – Jumaǵalı Tleýlınniń, Sergeevka qalasyndaǵy qazaq orta mektebine – Kákimbek Salyqovtyń, Jambyl aýdanynyń ortalyqtandyrylǵan kitaphana júıesine – Safýan Shaımerdenovtiń esimderin berý boıynsha jumys júrgizilip jatyr», - deıdi mádenıet, tilderdi damytý jáne arhıv isi basqarmasy basshysynyń mindetin atqarýshy.

Búgingi kúni SQO-da Lenın, Kommýnızm, Qyzyl ásker, Chapaev sııaqty ataýlarǵa ıe 13 aýyldyq okrýg, 33 aýyl, 300-ge jýyq kóshe bar.