SQO-da 125 myńnan astam adam medıtsınalyq saqtandyrylmaǵan

PETROPAVL. QazAqparat – Soltústik Qazaqstan oblysynda mindetti áleýmettik medıtsınalyq saqtandyrýdy júzege asyrý jónindegi aımaqtyq shtab otyrysy onlaın ótip, óńirdegi saqtandyrýǵa qatysty máseleler qaraldy, dep habarlaıdy QazAqparat tilshisi.

Másele joq emes. Óńirlik shtab tóraǵasynyń orynbasary, «Áleýmettik medıtsınalyq saqtandyrý qory» KEAQ SQO fılıalynyń dırektory Larısa Gordeevanyń aıtýynsha, óńir halqynyń sany 565 myńnan assa, 281 myń adam (shamamen 50 %) - azamattardyń jeńildikti sanattaryna jatady.

Olar úshin mindetti áleýmettik medıtsınalyq saqtandyrý jarnasyn memleket tóleıdi. Al 125 myńnan astam adam saqtandyrylmaǵandar qatarynda.

Olardan aýdarym men jarna júıesiz jáne ýaqtyly túspeıdi. Osylaısha oblysta medıtsınalyq saqtandyrylǵandardyń úlesi 77,8 % qurap otyr.

«Óńirlik shtabtyń tamyz aıynda ótken sońǵy otyrysynan bastap saqtandyrylmaǵan halyq sany barlyq aýdandar men Petropavl qalasynda 4 049 adamǵa azaıdy. Qazirgi ýaqytta saqtandyrylmaǵan azamattardyń basym bóligi Petropavlda – 28,3 % jáne Taıynsha - 24,4 %, Aıyrtaý - 24,3 %, Ǵ.Músirepov - 25,2 % jáne M. Jumabaev - 24,0 % aýdandarynda turady. Osylaısha, oblystyń 125 346 turǵyny MÁMS júıesinde joq, olardyń profılaktıkalyq skrınıngtik qarap-tekserý, konsýltatsııalyq-dıagnostıkalyq kómek, medıtsınalyq ońaltý qyzmetteri, birqatar aýrýlar boıynsha josparly statsıonarlyq kómek sııaqty medıtsınalyq kómektiń belgili bir túrlerin alýǵa quqyǵy joq», - deıdi Larısa Gordeeva.

Saqtandyrylmaǵan azamattardyń 32 % - 30-40 jasta bolsa, 25 % - 41-50 jastaǵylar.

«Munyń bir sebebi MÁMS jarnalary men aýdarymdary boıynsha jumys berýshilerdiń óz qyzmetkerleri úshin bereshek bolýy. Memlekettik kirister departamentiniń derekteri boıynsha qazir 6,9 mln teńge qaryz bar. Onyń ishinde 4,5 mln teńgesi 301 zańdy tulǵanyń, 2,4 mln teńge 858 jeke kásipkerlik sýbektisiniń bereshegi», - deıdi óńirlik shtab tóraǵasynyń orynbasary.