SQO-da 113 eldi mekende aýdan ákimderiniń saılaýy ótip jatyr

<p>Soltústik Qazaqstan oblysynda búgin úsh aýdannyń ákimi saılanbaq. Qazirgi ýaqytta 113 eldi mekende turǵyndar daýys berip, óz tańdaýlaryn jasap jatyr, dep habarlaıdy <a href="Kazinform" target="_blank" rel="noopener">Kazinform.</a></p>

SQO saılaý komıssııasynyń málimetinshe, Esil, Mamlıýt jáne Tımırıazev aýdandarynyń ákimderin 36 myńnan astam adam saılaıdy. 

Bul naýqanda oblystyq saılaý komıssııasy, 3 aýdandyq aýmaqtyq komıssııa men 84 ýchastkelik saılaý orny jumys istep jatyr. Jalpy, ýchastkelik saılaý komıssııalaryna 440 adam múshelik etedi. 

Foto: Aqerke Dáýrenbekqyzy

«Óńirde bastapqyda 12 kandıdat boldy. Olardyń 6-aýy partııa atynan tússe, qalǵan 6-sy óz-ózin usynǵan. 12 kandıdattyń bireýi memlekettik qyzmet týraly zańnyń talaptaryna saı kelmedi, ekinshisi qajetti qujattardy tolyq usynǵan joq. Sondyqtan osy 12 kandıdattyń tek 10-y tirkeldi, biraq keıin ekeýi óz erkimen kandıdatýrasyn aldy. Búgin Esil aýdanynda saılaýshylar eki kandıdatqa, Mamlıýt jáne Tımırıazev aýdandarynda úsh kandıdatqa daýys berip jatyr», - deıdi SQO saılaý komıssııasysynyń múshesi Saǵyndyq Rahymjan.

SQO-daǵy pılottyq aýdandarda saılaý qalypty ótip jatyr. Máselen Mamlıýtka aýdanyndaǵy №324 saılaý ýchaskesinde 1 614 adam daýys berýi kerek, olardyń 35-i múgedektigi bar jandar. Komıssııa músheleri olarǵa úılerine baryp, tańdaý jasaýǵa múmkindik berdi. 

Foto: Aqerke Dáýrenbekqyzy

Aýdandaǵy keı saılaý ýchaskesinde kontserttik baǵdarlama uıymdastyryldy. Jalpy halyq naýqanǵa belsendi qatysyp jatyr. 

«Jańa Qazaqstannyń» ereksheligin ózimiz baıqap jatyrmyz. Aýdan ákimderin halyq buǵan deıin saılaǵan emes. Turǵyndar senim artyp daýys bergennen keıin ákimderdiń jaýapkershiligi arta túsedi, ári biletin, qolynan is keletin adamdy tańdaımyz. Aýdanda biraz sharýa atqarylǵanymen, sheshimin kútken másele de barshylyq», - deıdi Mamlıýt aýdanynyń qurmetti azamaty Qýandyq Kenjibaev.