SQO-da 109 túlek «Altyn belgiden» úmitti

PETROPAVL. QazAqparat – Soltústik Qazaqstan oblysynda bıyl 3 345 bala mektep bitiredi. Túlekterdiń 109-y «Altyn belgiden» úmitti, taǵy 200 oqýshy 11 synypty úzdik attestatpen aıaqtamaq, dep habarlaıdy QazAqparat tilshisi.

SQO-daǵy oqý jylynyń qorytyndysy oblystyq ákimdiktiń apparat keńesinde aıtyldy.

Oblystyq bilim basqarmasynyń basshysy Názir Jáshibekovtyń aıtýynsha, óńirde 465 mektep bolsa, onda 74 573 oqýshy bilim alyp jatyr. Bıyl 6 707 oqýshy 9-synypty bitiredi. Balalar qorytyndy emtıhandardan keıin mektepte oqýyn jalǵastyra alady. Ol úshin 15 tamyzǵa deıin mektepke 10-synypqa túsý týraly ótinish berýi kerek nemese attestattyń ortasha baly negizinde túsý emtıhanynsyz kolledjderge bara alady.

«Bıyl 3 345 oqýshy mektep bitiredi. Qazir «Altyn belgige» 109 úmitker bar, byltyr 138 bolatyn, al úzdik attestattan bıyl 200 túlek úmitti. 2-19 maýsym aralyǵynda balalar memlekettik qorytyndy emtıhandardy tapsyrǵannan keıin saltanatty is-sharalar ótedi. 20-22 maýsymda mektep sheshimi boıynsha attestattardy tapsyrý ótedi», - deıdi basqarma basshysy.

Bıyl 9-synyp túlekteri 4 emtıhan tapsyrady: 3 mindetti jáne bireýi tańdaý boıynsha. Barlyq emtıhandar jazbasha túrde ótkiziledi.

11-synyp túlekteri 5 emtıhan tapsyrady, onyń ishinde: 4 mindetti jáne bireýi tańdaý boıynsha. Bes emtıhannyń tórteýi – jazbasha, Qazaqstan tarıhy boıynsha emtıhan aýyzsha ótedi.

«Emtıhan jumystaryn mektepterdiń memlekettik komıssııalary, al «Altyn belgige» úmitkerlerdiń jumystaryn oblystyń jetekshi pedagogtary, qoǵamdyq birlestikterdiń, BAQ ókilderi kiretin biryńǵaı oblystyq komıssııa tekseredi», - deıdi Názir Jáshibekov.