SQO-da 100 myńǵa jýyq adamǵa medıtsınalyq saqtandyrý jasalmaǵan

PETROPAVL. QazAqparat – Soltústik Qazaqstan oblysynda búginde 99 468 adam medıtsınalyq saqtandyrylmaǵan. Bul óńir halqynyń jalpy sanynyń 18,6%, dep habarlaıdy QazAqparat tilshisi.

«Áleýmettik medıtsınalyq saqtandyrý qory» KEAQ SQO fılıalynyń málimetinshe, medıtsınalyq saqtandyrý júıesi engizilgen 2017 jyldyń shildesinen ótken jyldyń sońyna deıin qorǵa 36,4 mlrd teńge jarna jáne aýdarym retinde túsken. Onyń ishinde 22,3 mlrd teńge jumys berýshilerdiń, 14 mlrd teńge jeke kásipkerlerdiń úlesi.

«2022 jyldyń basynan beri Medıtsınalyq saqtandyrý qoryna jarnalar men aýdarymdar 349 686 adamǵa tústi, olar jumys isteıtin azamattar, jeke kásipkerler, derbes tóleýshiler. Aýdarylǵan qarajat kólemi 14,7 mlrd teńge. Al oblys turǵyndaryna mindetti medıtsınalyq saqtandyrý aıasynda medıtsınalyq kómek kórsetýge 21,8 mlrd teńge bólindi», - deıdi «Áleýmettik medıtsınalyq saqtandyrý qory» KEAQ SQO fılıalynyń dırektory Larısa Gordeeva.

Statıstıka málimetterine sáıkes, SQO-da 1 aqpan 2023 jyly halyq sany 534 024 adamdy qurady. Olardyń ishinde saqtandyrylǵandar sany 434 556 adamdy nemese oblys halqynyń jalpy sanynyń 81,4 %, Qazaqstan boıynsha kórsetkish 82,5 % qurady.

Al saqtandyrylmaǵandar sany 99 468 adamdy qurady.

«Byltyr 1 aqpanda 109 303 adam saqtandyrylmaǵandar qatarynda boldy. ıAǵnı 9835 adamǵa azaıdy. 273 760 adam jeńildikti sanatqa jatady. Memleket «Mindetti áleýmettik medıtsınalyq saqtandyrý týraly» QR Zańynyń 26-babyna sáıkes olar úshin jarna tóleıdi.

Oblystyń qalalary men aýdandary boıynsha saqtandyrylmaǵan azamattardyń eń kóp sany Petropavl qalasynda turady – 46 943 adam. Aýyldyq okrýgter boıynsha Taıynsha aýdany – 8994 adam, Aıyrtaý aýdany – 6895 adam, Maǵjan Jumabaev aýdany – 5593 adam kósh bastap tur.

Petropavl qalasynda 46 943 turǵyn MÁMS júıesinde saqtandyrylmaǵan, sondyqtan olar MÁMS júıesinde medıtsınalyq kómek ala almaı otyr», - deıdi Larısa Gordeeva.