SQO-da 100-den asa mehbrıgada tasqynnyń saldaryn joıýǵa qatysady

<p>PETROPAVL. KAZINFORM &ndash; Soltústik Qazaqstan oblysynda tasqynnyń saldaryn joıýǵa jáne jóndeýge kelmeıtin úılerdi buzýǵa mehanıkalyq brıgadalar qurylady.&nbsp;</p>

SQO ákimdiginiń málimetinshe, óńir basshysy Ǵaýez Nurmuhambetovtiń tóraǵalyǵymen sý tasqynynyń zardaptaryn joıý jóninde keńes ótti. Qazir sý tasqynynan zardap shekken turǵyn úılerdi qalpyna keltirý basty nazarda. Osy maqsatta óńirdegi barlyq aýdannyń árqaısysynan 8 tehnıka men 5 mehanıkalyq brıgada jasaqtalyp, jóndeý-qalpyna keltirý jumystary júrgizilmek.

Foto: SQO ákimdiginiki

Oıqala aýdanynda Petropavlda qurylǵan 30 brıgada jumys isteıdi. Bul yqshamaýdandy qalpyna keltirýge sondaı-aq Ǵ.Músirepov, Taıynsha, Ýálıhanov aýdandarynyń brıgadalary kómekke kelmek.

Bylǵary zaýyty kentin jónge keltirýge 4 aýdan bekitildi, olar: Esil, Jambyl, Shal aqyn jáne Aıyrtaý aýdandary.

Zarechnyı kentinde M.Jumabaev, Tımırıazev, Aqjar jáne Mamlıýt aýdandarynyń mehanıkalyq brıgadalary jumys isteıdi.

Al Aqqaıyń aýdanynyń brıgadasy Qyzyljar aýdanyna kómekke jiberiledi.

Jalpy tasqynnyń saldaryn joıýǵa oblystyń túkpir-túkpirinen barlyǵy 100-den asa mehbrıgada jumyldyrylady.

Joldardy jóndeýge jáne sý ákelgen qoqystan tazalaýǵa 50 tehnıkasy bar 8 jol-qurylys uıymy bekitilgen, olar qajet bolǵan jaǵdaıda qalpyna keltirý jumystaryna da tartylmaq.

Oblys ákimi Ǵaýez Nurmuhambetov jaýapty memlekettik organdarǵa qalpyna keltirý jumystaryna qajetti brıgadalar men tehnıkalardy bólip, jumystardy qysqa merzimde júrgizýdi tapsyrdy. Sondaı-aq aımaq basshysy qurylys materıaldarynyń baǵasyn jasandy túrde kóterýge jol berilmeıtindigin eskertti.

Sý ketkesin, tez arada turǵyn úılerdi tehnıkalyq tekserý men baǵalaýdy júrgizý qajet, onyń nátıjeleri boıynsha zalaldy óteý týraly sheshim qabyldanbaq.

Sonymen qatar, birinshi kótergish sorǵy stantsııasyn qalpyna keltirý boıynsha is-sharalar josparyn ázirleý tapsyryldy.