SQO-da 1 mln teńge para alǵan departament basshysy 30 mln teńge aıyppul tóleıtin boldy

<p>ASTANA. KAZINFORM &ndash; Petropavl qalalyq soty Soltústik Qazaqstan oblysy boıynsha Qylmystyq-atqarý júıesi departamentiniń bastyǵy A.Mustafınovqa qatysty úkim shyǵardy.</p>

«Ol deldal arqyly SQO Qylmystyq-atqarý júıesi mekemelerine un jetkizý qyzmetterinde memlekettik satyp alý shartyn jasasýǵa járdemdeskeni úshin kásipkerden 1 mln teńge mólsherinde para alý boıynsha kináli dep tanyldy.

Sot úkimimen Mustafınov memlekettik qyzmette jáne kvazımemlekettik sektor sýbektilerinde laýazym atqarý quqyǵynan ómir boıyna aıyra otyryp, 30 mln teńge mólsherinde, para berýshi men deldal tıisinshe 20 mln jáne 10 mln teńge kóleminde aıyppulǵa sottaldy», — dep jazdy Sybaılas jemqorlyqqa qarsy is-qımyl agenttiginen.

Úkim zańdy kúshine engen joq.

Budan basqa, engizilgen usynymnyń nátıjeleri boıynsha Іshki ister mınıstriniń buıryǵymen tıisti vedomstvolyq baqylaýdyń jáne profılaktıkalyq jumystyń bolmaǵany úshin Qylmystyq-atqarý júıesi komıtetiniń basshylyǵy tártiptik jaýaptylyqqa tartyldy.

Atap aıtqanda, komıtet tóraǵasy ádilet polkovnıgi T. Jánibekovke sógis, onyń orynbasary ádilet general-maıory M. Aıýbaevqa, ózdik qaýipsizdik, kadrlyq jumys jáne tyldyq qamtamasyz etý basqarmalarynyń bastyqtaryna qatań sógis jarııalandy.

Osy buıryqpen Mustafınov teris sebeptermen ishki ister organdarynan bosatyldy.