SQO-da 1,3 mln teńge para aldy dep kúdikke ilingen polıtseı jumystan qýyldy
Soltústik Qazaqstan oblysynyń polıtsııa departamentinde SQO Sybaılas jemqorlyqqa qarsy kúres qyzmeti jáne SQO PD Ózindik qaýipsizdik basqarmasy qyzmetkerlerimen anyqtalǵan, sybaılas jemqorlyq quqyq buzýshylyq faktisin qarastyrý boıynsha tártiptik komıssııanyń shuǵyl keńeıtilgen otyrysy ótti.
Beıneselektorlyq rejımde barlyq aýdandyq bólinister men Shal aqyn aýdany polıtsııa bóliminiń jeke quramy qatysty. 21 sáýir Shal aqyn aýdanynda bir mıllıon úsh júz myń teńge kóleminde para aldy degen kúdikpen aýdandyq polıtsııa bólimi basshysynyń orynbasary ustalyp, ýaqtysha ustaý ızolıatoryna qamaldy.
SQO PD Tártiptik komıssııasynyń sheshimimen ol ishki ister organdarynan jumystan shyǵaryldy. Onyń tikeleı basshysy – APB basshysy atqaryp otyrǵan laýazymynan bosatyldy. Sonymen qatar, birqatar basshylar, onyń ishinde PD basshysynyń eki orynbasary qatań tártiptik jaýapkershilikke tartyldy. Para alý faktisi boıynsha Sybaılas jemqorlyqqa qarsy kúres qyzmeti QR Qylmystyq kodeksiniń 366-baby boıynsha sotqa deıingi tergeý júrgizip jatyr.
«Búgin men jaza qoldaný týraly buıryqqa qol qoıdym. Biz aldaǵy ýaqytta da óz qatarymyzdaǵy quqyq buzýshylarǵa qatań sharalar qoldanatyn bolamyz. Mundaı keleńsiz jáıt barlyq jeke quram tótenshe jaǵdaı kezinde erekshe rejımde qyzmet atqaryp jatqan ýaqytta oryn aldy. Kez kelgen sybaılas jemqorlyq quqyq buzýshylyq kórinisteriniń jolyn ymyrasyz kesetin bolamyz», – dedi SQO PD basshysy Marat Tólebaev.
Facebook áleýmettik jelisinde Marat Tólebaevtyń jeke paraqshasy bar. Departament basshysy atalǵan paraqsha arqyly kez kelgen azamatpen ashyq dıalog júrgizýge daıyn. Sondaı-aq, SQO Polıtsııa departamentiniń áleýmettik jelilerdegi akkaýnttarynda vedomstvodaǵy Ózindik qaýipsizdik basqarmasynyń senim telefondary ornalastyrylǵan (61-26-89, 8-700-161-26-89 WhatsApp).
Atalǵan telefon nómirleri arqyly azamattar polıtsııa qyzmetkerleriniń quqyqqa qaıshy áreketteri, ásirese karantındik is-sharalarmen baılanysty faktiler týraly habarlaı alady.