SQO: Bir táýlikte 2 myńǵa jýyq adam qaýipsiz jerge shyǵaryldy

<p>PETROPAVL. KAZINFORM &ndash; Soltústik Qazaqstan oblysynda bir táýlikte 2 myńǵa jýyq adam qaýipsiz jerge shyǵaryldy. Evakýatsııa aýyldarda ǵana emes, Petropavldyń shetkeri aýdandarynda da júrip jatyr.&nbsp;</p>

SQO Tótenshe jaǵdaılar departamentinde sý tasqynyna qatysty brıfıng ótip, vedomstvo bastyǵy Erik Sarybaev qazirgi jaǵdaıǵa toqtaldy.

«Jaǵdaı óte qıyn. Osy kúnge deıin 617 úıdi sý basty, alaıda bul tsıfr ár mınýt saıyn ózgerip jatyr. Ókinishke oraı, sý kirgen úılerdiń sany kóbeıý ústinde. 
Tek ótken táýlikte Petropavl qalasynda ǵana Esil ózeni sýynyń deńgeıi 1 metrden joǵary kóterildi. 3670 adam oblys boıynsha qaýipsiz aımaqqa kóshirildi. Tek keshe ǵana 1792 adam evakýatsııalandy.
Petropavldaǵy Oıqala, Bylǵary zaýyty aýdandarynan qazir turǵyndardy kóshirý jumysy júrgizilip jatyr. Turǵyndar negizinen týystaryna ketip jatyr. Alaıda evakýatsııalyq pýnktter sany ósip jatyr, taǵy 3 mektep jáne eki jataqhana berildi. 2,5 myń úı janýary qaýipsiz aımaqqa shyǵaryldy», - dedi Erik Sarybaev.

Qazirgi ýaqytta tek jeke quramnan 4,5 myń adam tasqynmen kúreske jumyldyrylǵan.

Joldardy sý basý faktileri bar. Avtojoldarda 65 ýchaske ústinen sý ketti, onyń 19-y áli de sý astynda jatyr.

«Sýdyń aǵyny joǵary, aldyńǵy jyldarmen salystyrǵanda bıylǵy sý tasqynynyń jaǵdaıy bólek, buryn Sergeev sý qoımasynan shyqqan muzdyń barlyǵy jetkenshe deıin erip úlgeretin. Bıyl sýmen birge muz da kele jatyr. Muz úlken bólshekpen kelip, joldaǵy kezdesken aeǵashtardy, qurylystardy, elektr baǵandaryn pyshaqpen keskendeı buzyp keledi.

Sý tasqynynyń aldyn alý úshin bógetter, dambalar nyǵaıtyldy, eldi mekenderdiń aınalasyna úıindiler jasaldy. Alaıda muz keptelisi munyń bárin buzyp jatyr.

Eń qıyn jaǵdaı qazir Petropavlda qalyptasqan. Birinshi kótergish sorǵylaý stantsııasy isten shyqty. Oǵan sebep – avarııalyq jaǵdaıda qosylatyn tórt elektr jelileri baǵandarynyń birdeı muzdan zaqymdanýy. Qazirgi ýaqytta jergilikti atqarýshy organdardyń, Úkimettiń tikeleı baqylaýymen jóndeý jumysy kúni-túni júrgizilip jatyr», - dedi Erik Sarybaev.

Departament basshysynyń aıtýynsha, turǵyndardyń kópshiligi arnaıy qyzmetterdiń talaptaryna qulaq aspaýda. Bul – birinshi kezekte qaýipsizdik, adamdar óz ómirin qaýipke tigýde.

Osyǵan oraı Erik Sarybaev turǵyndardy kóshirý jumystaryna túsiniktikpen qaraýdy surady. Sýdyń kelgenin kútpeı aldyn ala evakýatsııalaý júrgizýge týra kelip jatyr.