SQO bıyl órtten 143 mln teńge shyǵyn shekti

PETROPAVL. QazAqparat – Soltústik Qazaqstan oblysynda aýmaǵynda bıyl 400-ge jýyq órt tirkeldi, kelgen shyǵyn 143 mln teńgeden asady, dep habarlaıdy QazAqparat tilshisi.

Petropavlda óńirlik kommýnıkatsııalar qyzmetinde SQO tótenshe jaǵdaılar departamentiniń bastyǵy Ramıl Kamalov oblystaǵy órtterge qatysty aqparat berdi.

Óńirdiń bas qutqarýshysynyń aıtýynsha, bıyl 367 órt tirkelgen. Saldarynan 32 adam qaza taýyp, 34 kúıik aldy. Bul ótken jylmen salystyrǵanda kóp, byltyr 22 adam mert bolyp, segizi jaraqattanǵan edi. 2020 jyly kelgen shyǵyn 393 mln teńge bolsa, bıyl 143 mln teńgeden asady.

«Óńirde tabıǵı órtter órship tur. Órtke qaýipti maýsym bastalǵaly qýraǵan shóp, qoqys pen qamys 750 ret janǵan. 34,3 ga aýmaqta 16 orman órti tirkeldi, kelgen materıaldyq shyǵyn 3 mln teńgeden asady. Sondaı-aq 423 ga 38 dala órti tirkeldi.

Byltyr 635 ga dala janyp ketti, 15 orman órt tirkelip, kelgen shyǵyn 1 mln 238 myń teńgeni quraǵan bolatyn», - deıdi Ramıl Kamalov.

Keı aýdandarda orman órti 50 %-ǵa artqan.

«Orman órtiniń shyǵýyna 6 jaǵdaıda jumys barysynda qaýipsizdik erejeleri saqtalmaǵan. 5 jaǵdaıda kináliler anyqtalmady. Ekeýinde otty abaısyz qoldaný sebep bolsa, taǵy sonsha jaǵdaıda ormanǵa jaı túsip, órt shyqqan.

Tabıǵı órtterdiń aldyn alý maqsatynda oblys aýmaǵynda quramynda 233 adam bar 47 mobıldi top jumys isteıdi. Olar 700-den astap reıd ótkizip, 96 zań buzýshyny anyqtady. Olardyń 95-i birinshi jolǵa eskertildi, bireýine 65 myń teńge shamasynda aıyppul salyndy», - deıdi departament bastyǵy.

Jalpy SQO aýmaǵynda órt qaýpi joǵary 67 eldi meken, 15 saýyqtyrý lageri jáne 41 demalys orny bar. Olardyń barlyǵy mamandardyń nazaryna alynǵan.