SQO Báıterek aýylynyń turǵyndary qańǵyrǵan ıtterden qorǵaýdy suraıdy

<p>PETROPAVL. KAZINFORM &ndash; Soltústik Qazaqstan oblysy Qyzyljar aýdany Báıterek aýylynda qańǵyrǵan ıtter mal-janǵa shabýyldap, turǵyndardyń mazasyn ketirdi. Quzyrly organdarǵa shaǵymdanǵanmen, nátıje joq.&nbsp;</p>

Báıterek aýylynyń turǵyny Aınur Qudaıbergenovanyń aıtýynsha, qańǵyrǵan ıtter úıir quryp, tobymen júretin bolǵan. Taǵylanǵan ash janýarlar túnde qoraǵa túsip, eki malyn jaryp ketken.

Foto: Aınur Qudaıbergenova

«Túnde qora esigin ilgekke jabýdy umytyp ketippiz. Tańerteń kelsek eki maldy talap tastaǵan. Qazir túnde dalaǵa shyǵýdan qaldyq», - deıdi aýyl turǵyny.

Qańǵyrǵan ıtter mektep mańyn toryp, balalarǵa da shabýyldaı bastaǵan.

«Balalarǵa obal. Dalaǵa shyǵyp, bir mezgil oınaýdan qaldy. Mektepke aparyp, ákelemiz. Eresekterdiń ózi emin-erkin júre almaıdy. Ash ıtter qaýyp alýǵa daıyn turady. 
Jaqynda kózimshe úsh taýyǵymdy talap tastady. Ýchaskelik polıtseıge aıttym. Aýyldyq ákimdik ótemaqy tóledi. Biraq barlyq aýyl turǵyndaryna bere bermeıdi ǵoı», - deıdi aýyldyń taǵy bir turǵyny Saqyp Qulmurzınova.

Foto: Aınur Qudaıbergenova

Báıterek aýylyna jaqyn mańda qoqys alańy bar. Kereksiz bolǵan ıtterin jurt sol jerge aparyp tastaıtyn bolǵan. Qańǵyrǵan ıtterdiń kóbeıýine sol sebep.

«Qyzyljar aýdanynda ıesiz ıtter men mysyqtardy ustaýǵa oryn qarastyrylmaǵan. Olshanka aýylynda arnaıy pýnkt salý josparlanǵan. Qazirgi ýaqytta jer telimi bólinip, jobalyq-smetalyq qujattar ázirlenýde. Ol jerde qańǵyrǵan janýarlar zararsyzdandyrylyp, chıpteledi. Qazirgi ýaqytta bul jumys toqtap tur. 
It adamdy qapqan jaǵdaıda dárigerge qaralyp, keıin aýdandyq veterınarııa stantsııasyna shaǵym jazyp qaldyrýy kerek», – dedi SQO veterınarııa basqarmasynyń baspasóz hatshysy Amanjol Nurtazın.