SQO aıyp turaǵynda Reseıden urlanǵan 7 mashına tur
SQO polıtsııa departamenti baspasóz qyzmetiniń málimetinshe, sheteldik tirkeýdegi kólikterdi kópke deıin jol qozǵalysy erejeleriniń buzylýyn qadaǵalaıtyn avtomattandyrylǵan qural tirkeı almaǵan.
Derekter bazasyn biriktirýdiń arqasynda endi bul kólikterdiń júrgizýshileri jasaǵan zańbuzýshylyqtardy ıntelektýaldy beınebaqylaý júıesi qadaǵalaı alady.
Máselen, bıyl Petropavlda reseılik tirkeýdegi kólik júrgizýshileri tarapynan 1475 zańbuzýshylyq anyqtaldy.
«Shetelden ákelingen birneshe mashına tıisti qujattarsyz satyp alynǵandar nemese onyń burynǵy ıesi kólikti tirkeýden shyǵarǵan. Elimizde eshqaıda tirkeýde joq kólikti minýge tyıym salynǵan. Mundaı kóligi barlar qajetti qujattardy qalpyna keltirgeni jón», - deıdi SQO PD ákimshilik polıtsııa basqarmasynyń bastyǵy Serik Áljanov.
Shetelde urlanǵan kólikterdi elimizde paıdalanǵan qazaqstandyqtar mashınadan aıyrylady.
Búginde SQO-da qylmystyq isterdiń qozǵalýyna baılanysty izdeýde bolǵan reseılik 7 kólik aıyp turaǵyna qoıyldy.
«Aqqaıyń aýdanynda 2019 jyldan beri urlanǵandar qatarynda bolǵan kólik tabyldy. Nissan Qashqai kóligi reseılik áriptesterimiz jibergen baǵdar boıynsha anyqtaldy. Aıyp turaǵyna qoıylǵan kólikterdiń barlyǵy qajetti rásimder aıaqtalǵannan keıin shetelge qaıtarylady. Olardy teksermeı satyp alǵan qazaqstandyqtarǵa zań boıynsha eshqandaı ótemaqy qarastyrylmaǵan», - deıdi Serik Áljanov.