SQO aýylynda órt sóndirý bólimi ashyldy
SQO Tótenshe jaǵdaılar departamenti baspasóz qyzmetiniń málimetinshe, Qyzyljar aýdany Býgrovoe aýylynda jumysyn bastaǵan órt bólimshesi «Shaǵala Agro» JShS-niń negizinde jumys istemek.
Býgrovoe aýyldyq okrýgine 5 eldi meken qaraıdy. Turǵyndar sany 2 myńnan asady. Órt sóndirý bólimin ashýǵa aýyldyq okrýgtiń aýdan ortalyǵynan 63 km shalǵaı jatýy sebep bolǵan.
«Memlekettik órtke qarsy qyzmet joq shalǵaı eldi mekenderde jergilikti atqarýshy organdardyń kómegimen órt sóndirý bólimderin qurý jóninde is-sharalar jospary bekitilgen. Memlekettik-jekeshelik áriptestik aıasynda aýdandyq ákimdik «Shaǵala Agro» JShS-men memorandýmǵa qol qoıdy. Nátıjesinde seriktestik órt sóndirý bólimshesin óz qarajatyna ustamaq. Jańadan qurylǵan komanda órtti sóndirýge ǵana emes, basqa da tótenshe jaǵdaılarmen kúreske jumyldyrylady. Qıyn jaǵdaıǵa tap bolǵan turǵyndarǵa kómektesedi», - deıdi órt sóndirý bóliminiń saltanatty ashylýyna qatysqan SQO TJD bastyǵynyń orynbasary Nurlan Atyǵaev.
Órt sóndirý bólimi jyly garajben, arnaıy ATs-2,5-40 órt sóndirý kóligimen qamtylǵan. Jeke quramnan eki adam táýlik boıy kezekshilik atqarmaq.