SQO aýyldaryndaǵy kópqabatty úılerdiń 40% ǵana ortalyq jylý júıesine qosylǵan
Óńirlik kommýnıkatsııalar qyzmetinde ótken brıfıngte SQO energetıka jáne turǵyn úı-kommýnaldyq sharýashylyq basqarmasy basshysynyń mindetin atqarýshy Pavel Shılov byltyr óńirdiń turǵyn úı-kommýnaldyq sharýashylyq salasynda atqarylǵan jumystardy qorytyndylap, josparlarmen bólisti.
SQO-nyń aýdandarynda qazirgi ýaqytta 10 myńǵa jýyq páteri bar 690 kópqabatty úı bar, sonyń 40% ǵana ortalyq jylytý jelisine qosylǵan.
«Bul úılerdiń barlyǵyna kezinde ortalyqtan jylý berilgen. Іsten shyqqan júıeni birtindep qalpyna keltirip jatyrmyz. 2019-2022 jyldar aralyǵynda 3,6 myńǵa jýyq páteri bar 115 kóp qabatty úı jylýǵa qosyldy. Bul jumys bıyl jalǵasyn tabady. Aıyrtaý aýdanynda – 2, Aqjarda – 5 úıdi ortalyq jelige qosý josparda bar», - deıdi Pavel Shılov.
«Aýyl – El besigi» memlekettik baǵdarlamasy aıasynda byltyr jylýmen qamtýǵa baılanysty 4 joba júzege asty.
Bul maqsatqa 860 mln teńge jumsaldy.
Sonyń ishinde Novoıshımkada 607,7 mln teńgege ortalyq qazandyq jáne Saýmalkólde 66,9 mln teńgege ortalyq qazandyq salyndy.
Budan basqa Saýmalkól men Beskólde jylý jelileri tartylǵan.
«Osy 4 jobany júzege asyrý nátıjesinde 5700 adam turatyn 45 kópqabatty úıdi jáne birneshe áleýmettik nysandy ortalyqtandyrylǵan jylý jelisine qosý múmkin boldy. Byltyr oblystyq bıýdjet esebinen Mamlıýt aýdanynda jylý jelisiniń qurylysy bastaldy. Jobanyń jalpy quny 188 mln teńge, onyń 95 mln teńgesi byltyr ıgerildi. 6,9 mlrd teńgege Novoıshımka, Tımırıazevo, Talshyqta jylý jelileriniń qurylysy bastalmaq. Sondaı-aq Tımırıazevoda ortalyq qazandyqty salý josparda bar. Qazir eki jobanyń qujattary ázirlenip, qarjy bólinýi úshin tıisti mınıstrlikterge jiberildi», - deıdi Pavel Shılov.
Bul tórt joba iske asqan jaǵdaıda taǵy 72 kóp qabatty úı, 460 jeke turǵyn úı ortalyq jylý jelisine qosylady.
Taǵy 138 kópqabatty úı men 25 áleýmettik nysandy qosýǵa múmkindik týady.