SQO aýmaǵyna Atlantıka tsıklony áser etip jatyr – sınoptıkter

PETROPAVL. QazAqparat – Soltústik Qazaqstan oblysy aýmaǵynda kúnniń kúrt jylyp, jańbyr jaýýyna, qatty jel turýyna atlantıkalyq tsıklon áser etip otyr, dep habarlaıdy QazAqparat tilshisi.

«Qazgıdromet» RMK SQO fılıalynyń málimetinshe, aýa raıyndaǵy ózgeris týraly keshe saǵat 12.00 shamasynda daýyldy eskertý berildi.

Habarlamada 23 aqpan kúni jaýyn-shashynnyń – jańbyr, qardyń jaýatyndyǵy jóninde, qatty kóktaıǵaq bolatyndyǵy jáne óńirdiń ońtústik, batys, soltústiginde qatty burqasyn bolatyndyǵy aıtyldy.

Ońtústik-ońtústik-batystan soqqan jeldiń ekpini kúndiz 15-20 m/s deıin bolsa, túnde onyń kúshi 23 m/s deıin jetpek.

Sondaı-aq, oblystyń batys aýmaǵynda tuman bolady dep kútilýde.

«Oblys aýmaǵyna jyly fronttary bar, jańbyr men qar túrinde jaýyn-shashyny, kóktaıǵaǵy, tuman, ekpindi jeli jáne ylǵaldyń úlken qory bar belsendi Atlantıkalyq tsıklon áser etedi. Іs júzinde oblys aýmaǵynda 21 aqpanda saǵat 21.00-den bastap aýa temperatýrasy -1-6 gradýs aıazdan +1,+2-ge deıin birtindep joǵarylaýy, jańbyr men qar túrinde aralas jaýyn-shashynnyń túsýi baıqaldy. Oblys aýmaǵynyń basym bóliginde mólsheri 0,3-4,6 mm bolatyn jańbyr jaýdy. Taıynsha, Aqjar jáne Ýálıhanov aýdandarynda jaýyn-shashyn baıqalmady. Ońtústikten soqqan jeldiń ekpini 16 m/s, keı jerlerde ekpini 20 m/s jetti», - deıdi fılıal mamandary.

Mamandardyń aıtýynsha, SQO-da osyndaı jyly aýa raıy 2021 jyldyń 3-5 aqpan aralyǵynda bolǵan eken.

Ol joly oblys aýmaǵynda qar aralas jańbyr jaýyp, kóktaıǵaq bolǵan jáne termometr +5 kórsetken eken.

Buǵan deıin SQO-da qatty kóktaıǵaqqa baılanysty mektepterde sabaq onlaın formatqa aýystyrylyp, qoǵamdyq kólikterdiń jumysy ýaqytsha toqtatylǵanyn aıtqan edik.