SQO aýyldaryna elikterdiń artyn ala qabandar kire bastady

<p>PETROPAVL. KAZINFORM — Soltústik Qazaqstan oblysy Shal aqyn aýdany Balýan aýylyna bir top qaban kirdi. Jabaıy janýarlardy uıaly telefonǵa túsirip alǵan turǵyndar, beınejazbamen áleýmettik jelide bólisip jatyr.</p>

Jabaıy janýarlardyń eldi mekenderge kóptep kirýin mamandar túsindirdi. 

«Elikterdiń eldi mekenderge kirýi bizdiń óńir úshin aıtarlyqtaı erekshe jaıt emes. Reseıdiń Omby, Qorǵan oblystarynda da jabaıy janýarlardyń kóshege júrýi kóptep kezdesedi. Aqmola oblysynda da osyǵan uqsas jaǵdaı. Bul — qolaısyz aýa raıyna baılanysty. Soltústik óńirlerde qar jamylǵysy qalyńdasymen-aq, keı jyldary qysta jańbyr jaýady, tuıaqty janýarlarǵa ózdiginen qorek tabý qıyndyq ákeledi. Sondyqtan elikter azyq izdep ketedi. Reseıdiń elikteri mundaıda bizge aýady. Al jolda eldi mekenderge de kiredi. Bizdiń qyzmetter bıylǵy qysta tek Petropavldan ǵana 20-dan astam elikti ustap, ómir súretin tabıǵı ortasyna jiberdi», — deıdi SQO orman sharýashylyǵy jáne janýarlar dúnıesi aýmaqtyq ınspektsııasynyń bólim jetekshisi Oleg Bespalov. 

Mamannyń aıtýynsha, jaǵdaı baqylaýda. Jalpy oblys aýmaǵynda birneshe ańshylyq sharýashylyq bar.

Olar óz aýmaqtaryndaǵy jabaıy janýarlardy qys ýaqytynda qosymsha qorektendirýge mindettelgen. 

«Qabandar boıynsha da sol jaǵdaı. Qar qalyń, jemazyq tabý qıyndaǵan. Áleýmettik jelide taraǵan sońǵy rolıkke qaraıtyn bolsaq, bul aýyl az qonystanǵan, sanaýly úı ǵana qalǵan. Sondyqtan túz taǵylary eshqandaı qorqynyshsyz aýyldy basyp ótedi. Adamdardan qoryqpaıdy dep jatady. Árıne, qoryqpaıdy, óıtkeni olar adammen birinshi ret kezdesip tur, odan keler qaýipti bilmeıdi. Al qabandarǵa jaqyndaýdyń qajeti joq. Olar agressıvti janýarlar qatarynda. Sondaı-aq olardy atýǵa, aýlaýǵa tyıym salynǵanyn eskertemin, qylmystyq jaýapkershilik bar. 1,3 mln teńge mólsherinde shyǵynnyń ornyn toltyrady», — deıdi Oleg Bespalov.

SQO-da sońǵy ýaqytta áleýmettik jelide «qasqyr kórdik, qasqyr attyq» degen jazbalar da kóbeıdi. 

«Byltyr aqpan-naýryz aılarynda jabaıy janýarlardyń esebin júrgizdik. Qasqyr tirkelmedi. Biraq biz qasqyr bar basqa oblystarmen shekaralas jatyrmyz, sondyqtan olardyń paıda bolýy múmkin. Ormandarda qasqyrlarǵa qorek jetkilikti, sondyqtan olardan adamdarǵa keler qaýip shamaly», — deıdi Oleg Bespalov. 

Foto: áleýmettik jeliden

SQO-da sońǵy esep boıynsha qazirgi ýaqytta 20 myń elik, 3 myń dońyz bar.