SQO álemniń 30 eline karantınge jatqyzylatyn ónimdi eksporttaıdy

<p>PETROPAVL. KAZINFORM &ndash; Soltústik Qazaqstan oblysynda byltyr tıisti qujattardyń joqtyǵynan 575 tonna jáne 120 tekshe metrden astam karantınge jatqyzylatyn ónim el aýmaǵyna kirgizilmedi.</p>

SQO aýmaqtyq ınspektsııasy basshysynyń orynbasary Marat Shakımovtyń aıtýynsha, oblysta Reseımen shekarada tórt fıtosanıtarlyq baqylaý beketi ornalasqan. Bul jerde shekaradan ári-beri ótetin karantınge jatqyzylatyn ónim – túrli ósimdikter, olardyń tamyry, kesilgen gúlder men túrli kókónis, sańyraýqulaq, taǵy basqalary tekseriledi. 

«Byltyr SQO aýmaǵynan 3 mln 795 myń tonna karantınge jatatyn ónim tekserilip, jiberildi, olardyń 3 mln 176 myńy eksportqa ketse, qalǵany elimizdiń basqa aımaqtaryna jiberildi. Jalpy karantınge jatatyn ónim SQO-dan álemniń 30 eline eksporttalady. Sonyń ishinde óńirdiń 306 kásiporny Qytaıǵa karantınge jatqyzylǵan ónimdi áleýetti eksporttaýshylar tizimine engizildi, 38 kásiporyn bıdaıdy qalǵany basqa daqyldardy shetelge satady», - deıdi Marat Shakımov.

Byltyr ınspektorlar 18 myńǵa jýyq kólikti: 406 myń tonna, 123 myń tekshe metr, 2,5 mln dana ónimdi teksergen. Nátıjesinde fıtosanıtarlyq sertıfıkaty joq 36 kólikti qaıtaryp jiberdi. Kólikterde 575 tonna, 122 tekshe metr, 156 dana karantınge jatatyn ónim bolǵan. Zańdy buzǵan 3 jeke jáne 1 zańdy tulǵa ákimshilik jaýapkershilikke tartylyp, 310 myń teńge aıyppul tóledi. 

Al Lıtvadan ákelingen ónimderde batys gúl trıpsi anyqtalyp, partııa tolyǵymen órtelgen. 
Buǵan deıin SQO-da qyzanaqtyń qola tústiliginiń tospovırýsyna baılanysty 1,5 tonna tomattyń órteý arqyly joıylǵanyn aıtqan edik.