SQO ákimi Petropavldaǵy sorǵy stansasy qashan qalpyna keletinin aıtty

<p>ASTANA. KAZINFORM — Soltústik Qazaqstan oblysynyń ákimi Ǵaýez Nurmuhambetov Petropavldaǵy sý basqan sorǵy stansasyn qalpyna keltirýge qansha ýaqyt ketetinin aıtty.</p>

«Oblys ortalyǵyn sýmen qamtamasyz etetin birinshi kótergish stantsııa sý tasqynynyń alǵashqy kúnderinde muz kedergilerine tap bolyp, toqtan ajyrap qaldy. Búgin biz qajetti jabdyqty satyp aldyq. Osy aptada qalpyna keltirý jumysyn bastaımyz», — dedi óńir ákimi telearna tilshisine bergen suhbatynda. 

Onyń aıtýynsha, búginde SQO-nyń sý basqan aýdandary sektorlarǵa bólindi.

Foto: vıdeodan alynǵan skrın

Ár aýdanǵa jasaqtar jiberiledi jáne sý aıdaý tehnıkasyn jiberedi. 

Jalpy, qalpyna keltirý jumystaryna 800-den astam jumysshy men 400-den astam tehnıka tartylady.

Eske sala ketsek, 12 sáýirde Petropavl qalasynda sý jáne elektr berý qyzmetteri toqtaǵan edi.

Tasqyn sýmen kelgen muz birinshi kótergish sorǵy stansasyna qýat beretin elektr jelisiniń baǵandaryn qulatqan.