SQO ákimi selqos sharýalardan jerdi tartyp alýdy tapsyrdy

PETROPAVL. QazAqparat - Soltústik Qazaqstan oblysynyń ákimi Qumar Aqsaqalov aýylsharýashylyq jerleriniń tıimdi paıdalanylýy boıynsha atqarylyp jatqan jumystarǵa taldaý júrgizýdi tapsyrdy, dep habarlaıdy QazAqparat tilshisi.

Aýyl sharýashylyǵy jumysshylary kúnine oraı uıymdastyrylǵan saltanatty sharada óńir basshysy saladaǵy jetistiktermen qatar kemshilikterdi de atap kórsetti. Jerdi tıimdi paıdalaný máselesi de - sonyń qatarynda.

Q. Aqsaqalov gektarynan 10 tsentner de ónim ala almaǵan keıbir agroqurylymdarǵa nazar aýdardy. Ákim onyń sebebi memlekettik qoldaý tetikterin durys paıdalanbaý, jumys jaǵdaılarynyń bolmaýy jáne aýyl adamynyń aldyndaǵy jaýapkershilikti sezinbeý ekenine senimdi.

«Jerdi tıimdi paıdalanbaý máselesi bıyl asa ótkir bolyp tur. Aýdan ákimderi men tıisti qurylymdarǵa jerdiń tıimdi paıdalanylýyn qadaǵalaýdy tapsyramyn. Nashar jumys istep jatqandardan jerdi tartyp alyp, joǵary nátıjelerge qol jetkizip jatqandarǵa beremiz. Ár gektardan 7-8 tsentner ónim alǵan soń, eshqandaı tabys ta, damý bolmaıdy», - dedi Q. Aqsaqalov.

Ákim óńirdegi jerdiń qunarly ekenin, oblys aýyl sharýashylyǵynda kóptegen kórsetkishter boıynsha kóshbasshy bolyp otyrǵanyn aıtty. Búkil respýblıkadaǵy aýylsharýashylyq ónimderiniń 12%-yn Soltústik Qazaqstan oblysy beredi, budan tys, óńirde eldegi astyq daqyldarynyń 25%-y, maıly daqyldardyń 40%-y  ósiriledi.

Bıyl aýyl sharýashylyǵynyń jalpy ónimi 10 aıda 464 mlrd teńgeni qurady. Al agroónerkásip keshenine 64 mlrd teńge ınvestıtsııa salyndy. Dıqandar 5,3 mln tonna astyq bastyryp, ár gektardan ortasha 18,2-den 19 tsentnerge deıin ónim jınady.

Saltanatty sharada Qumar Aqsaqalov sala ozattaryna gramotalar tabystady.