SQO ákimi: Otan qorǵaýshylar kúni el tarıhymen baılanysty
Ult batyrlaryn eske alýǵa SQO ákimi Qumar Aqsaqalov ta keldi.
Dostyq alańynda el tarıhyndaǵy eń aýqymdy paradtyń onlaın-kórsetilimi uıymdastyryldy. Aıtýly sherýge soltústik óńirden QR Ulttyq gvardııasy áskerı ınstıtýtynyń 200-den astam kýrsanty qatysty.
Petropavlda Áskerı ınstıtýttyń kýrsanttary, Petropavl garnızony bólimsheleriniń ókilderi, quqyq qorǵaý organdarynyń qyzmetkerleri óńirdiń áskerı kúsh-qýaty men áleýetin kórsetti.
Jınalǵan soltústikqazaqstandyqtardy aımaq ákimi Qumar Aqsaqalov Otan qorǵaýshylar kúnimen quttyqtady. Quttyqtaý sózinde oblys ákimi bul merekeniń el tarıhymen, qazaqstandyq armııanyń kúshi men qorǵanys qabiletiniń qalyptasýymen tyǵyz baılanysty ekenin atap ótti.
Sondaı-aq, óńir basshysy Petropavl Áskerı ınstıtýtynyń 20 jyldan beri biliktiligi joǵary, talantty, kásibıligi men ustanymdarǵa adaldyǵyn is júzinde dáleldep júrgen ofıtserlerdi daıyndap kele jatqanyn aıtty.
Otan qorǵaýshylar kúnine oraı, oblys ákimi 15 soltústikqazaqstandyqqa minsiz qyzmeti men joǵary nátıjeler kórsetkeni úshin qurmet gramotalary men alǵys hattar tabystady. Olardyń arasynda polıtseıler, áskerı qyzmetshiler jáne QR Ulttyq gvardııasy Áskerı ınstıtýty men M.Qozybaev atyndaǵy SQMÝ áskerı kafedrasynyń oqytýshylary bar.
Saltanatty jıynda «Qarýly Kúshter ardagerleri» respýblıkalyq qoǵamdyq birlestiginiń Soltústik Qazaqstan oblystyq fılıalynyń tóraǵasy Borıs Sapenkov pen QR Ulttyq gvardııasy Áskerı ınstıtýtynyń kýrsanty Baqtııar Qaıyrbekov sóz sóıledi.
Jas bolsa da, Baqtııar Aqtóbedegi áskerı bólimshege shabýyl jasaǵan alty lańkeske jalǵyz ózi qarsy shyqqan. Bul erligi úshin Baqtııar QR Prezıdentiniń qolynan 3-dárejeli «Aıbyn» ordenin aldy.
Sharanyń saltanatty bólimi aıaqtalǵan soń, garnızonnyń barlyq bólimsheleri sap túzep, M.Jumabaev kóshesimen júrip ótti. Aıtýly mereke baǵdarlamasy óńirdegi shyǵarmashylyq ujymdar men quqyq qorǵaý organdarynyń qyzmetkerleri ázirlegen merekelik kontsertke ulasty.