SQO ákimi medsaqtandyrý týraly túsinikti tilmen jetkizýge keńes berdi

PETROPAVL. QazAqparat -Soltústik Qazaqstan oblysynyń basshysy Qumar Aqsaqalov aýdan ákimderine mindetti medıtsınalyq saqtandyrý júıesin (MMSJ) túsindirý boıynsha jeke jaýapkershilik jóninde eskertti, dep habarlaıdy «QazAqparat» HAA tilshisi.

Ákimdik jınalysynda qaralǵan máselelerdiń biri óńir turǵyndaryna MMSJ-ny túsindirý jumystary boldy. Medıtsınalyq qyzmetke aqy tóleý komıtetiniń SQO boıynsha departamenti dırektorynyń orynbasary Larısa Gordeevanyń aıtýynsha, oblysta 309 myń adam jarna tóleýden bosatylǵan. Turǵyndardyń bul 14 tobyna saqtandyrý jarnasyn memleket aýdaryp otyrady. Al qalǵandary ózderi tóleýi kerek.

«2017 jyldyń 1 shildesinen bastap jarnany birinshi bolyp jumys berýshiler men jeke kásipkerler, sonyń ishinde notarıýstar, advokattar men kásibı medıatorlar tóleıdi. Oblys boıynsha barlyǵy 189 236 adam», - dedi Larısa Gordeeva.

Onyń atap ótýinshe, jeke kásipkerlerdiń jarnasy eń tómengi jalaqynyń eki eselengen kóleminiń 5% quraıdy. Bıyl eń tómengi jalaqy 24 459 teńgeni quraıdy, ıaǵnı jarna mólsheri aıyna 2 445,9 teńge bolady.

 SQO ákimi Qumar Aqsaqalov turǵyndarmen jıi kezdesý ótkizip, MMSJ týraly aqparatty qarapaıym jáne túsinikti tilmen jetkizý kerektigin qadap aıtty.

«Adamdar habarlasyp jatsa, demek, olar MMSJ týraly estigen jáne olardy qandaı da bir aqparat qyzyqtyrady. Búgingi kúnge deıin sall-sentre-ge 51 myń adam habarlasty. Qaı aýdannan qońyraý az tússe, sol jaqta  turǵyndarmen aqparattyq jumysty kúsheıtý kerek», - dedi Qumar Aqsaqalov.

Mindetti medıtsınalyq saqtandyrý júıesi Qazaqstanda 1 shildeden bastap iske qosyldy.