SQO ákimi kómirge qatysty qoldan shý shyǵarmaýdy tapsyrdy
Oblys ákiminiń orynbasary Anton Fedıaev óńir qazandyqtarynyń 84 paıyzy qys maýsymyna daıyn ekenin habarlady. Bilim, densaýlyq saqtaý jáne mádenıet nysandary 71 jáne 83 paıyzǵa sáıkesinshe ázir bolyp shyqty. Bıýdjettik uıymdarǵa arnalǵan kómir satyp alynyp, temirjol stansalaryna jetkizilgen. A. Fedıaevtiń aıtýynsha, keıbir aýdandar kómirdi shyǵarýǵa asyǵar emes, bul halyqqa qajet kómirdi túsirý kezinde qıyndyqtar týǵyzýy múmkin.
«Aldaǵy jylytý maýsymynda halyqqa 364 myń tonna kómir qajet, olardyń 80 myń tonnasy nemese 22% daıyndaldy. Qazirgi ýaqytta oblystyń tyǵyryqty jerlerinde 45 myń tonna kómir qory bar. Onyń 9 myńy - Petropavlda. Tyǵyryqty jerlerdegi kómir jónindegi aqparat Turǵyn úı-kommýnaldyq sharýashylyǵy jáne energetıka basqarmasynyń saıtynda kórsetilgen. Ondaǵy maǵlumatttar apta saıyn jańartylyp otyrady», - dedi oblys ákimi.
Sheneýnikter oblys halqy qazirden bastap qys maýsymyna otyn ázirleı berýi kerek degen pikirde.
«Ótken jyly óńir halqynyń dúrligýin alaqol jetkizýshiler paıdalanyp ketti de, kómir baǵasyn kótere bastady. Sóıtip bul iske tikeleı aralasýymyzǵa týra keldi. Petropavl men aýdandar máseleni kúndelikti baqylap, kim qansha jetkizgeninen habar berip otyrýy kerek. Kómir jetispeı jatqan jaǵdaıda baǵasy da dereý sharyqtap ketedi. Munyń qajeti qansha? Odan keıin tyǵyryqty jerlerdiń ıelerine, razrezderdiń basshylaryna barýdyń qajeti ne? El dúrlikkennen bireý paıda kóredi. Kómir quny jóninde kúndelikti habar berip, halyqty eskertip otyrý kerek», - dedi oblys ákimi Qumar Aqsaqalov.
Óńirde kómirdiń 1 tonnasynyń quny - 7 myń teńgeden bastap 16 myń teńgege deıin.