SQO ákimi aýdandar men qala basshylaryna kómir baǵasyn baqylaýda ustaýdy tapsyrdy

PETROPAVL. QazAqparat – Soltústik Qazaqstan oblysy ákimdiginiń otyrysynda Qumar Aqsaqalov kómir baǵasyn qadaǵalaýdy tapsyrdy, dep habarlaıdy QazAqparat tilshisi.

«Byltyr kómir 15% arzandady. Endi aýdan ákimderi onyń jetkilikti bolýyn qadaǵalaýlary kerek. Qajetti qordy qamtamasyz etińizder. Tuıyqtardyń ıeleri, deldaldar jaǵdaıdy paıdalanyp, baǵany ósirip jibermesin. Bul qatań qadaǵalanýy tıis», - dedi oblys ákimi.

Byltyr baǵany turaqtandyrý maqsatynda ár aýyl boıynsha másele jeke-jeke qaraldy. Tuıyqtan aýdan ortalyǵyna deıin, odan aýylǵa deıingi jol shyǵyny esepteldi.

«Bıyl da osy ispettes jumystar júrgizilýi tıis. ıAǵnı, barlyq shyǵyndar esepke alynýy kerek: qandaı kómir qanshaǵa alyndy, tasymalǵa qansha qarajat jumsaldy? Baǵa tutynýshyǵa jetkenshe eki ese ósip ketpeýi úshin qadaǵalanýy kerek. Bul jumysqa monopolııaǵa qarsy komıtet de kirissin. Aryz túsken jaǵdaıda birden shara qoldanylatyn bolsyn», - dedi Qumar Aqsaqalov.

Óńir basshysynyń pikirinshe, tarıf – turǵyndar úshin mańyzdy máselelerdiń biri.

«Tarıfterdi tómendetý jáne olardy bir deńgeıde ustap turý úshin jyl boıy toqtaýsyz jumystar atqaryldy. Nátıjesinde elektr qýatynyń baǵasy 9,3%, jylýdyki - 1,1%, sýdyki – 9,2%, káriz júıesiniki – 3,4%, qoqysty shyǵarý jáne PIK qyzmeti 5% tómendedi. 2020 jyldyń 1 qańtarynan bastap kommýnaldyq aqylar ózgerissiz qalady», - dedi óńir basshysy.