SQO ákimi ákimi Qumar Aqsaqalov pen aktrısa Samal Eslıamova bir ýchaskede daýys berdi
Petropavldaǵy №595 saılaý ýchaskesi Balalar shyǵarmashylyǵy ortalyǵynda ornalasqan. Tańǵy saǵat 7.00-de ashylǵan ýchaskege alǵashqylardyń biri bolyp zeınetkerler kelip, óz tańdaýlaryn jasady. Jalpy bul saılaý ýchaskesine 1 416 adam tirkelgen.
«Bizdiń saılaý ýchaskemizge soǵys ardageri, 20 tyl eńbekkeri tirkelgen. 56 adam birinshi ret daýys beredi. Sondaı-aq múmkindigi shekteýli 4 adamǵa arnaıy kabına jabdyqtadyq», - deıdi №595 saılaý ýchaskesiniń tóraǵasy Qanat Sádýaqas.
Oblys ákimi Qumar Aqsaqalov tańerteń kelip daýys berdi. Onyń aıtýynsha, búgingi Prezıdent saılaýy azamattyq pozıtsııany bildirýdiń, bolashaqqa tańdaý jasaýdyń bir joly.
«Búginde elimiz damýdyń jańa kezeńinen ótýde. Biz tańdaǵan konstıtýtsııalyq reforma, ekonomıkalyq jáne qoǵamdyq sanany jańǵyrtý máseleleri qaı salada bolmasyn ózgeristi talap etedi. Memlekettiń, atqarýshy bıliktiń halyq aldyndaǵy eseptiligi, ashyqtyǵy azamattyq qoǵamnyń damýyna ákeledi. Bundaı protsesterde turǵyndardyń da azamattyq belsendiligi artady. Ár turǵyn aýlasy, aýyly, qalasy úshin jaýapkershilikti sezinetin, jany ashıtyn adam bolýy kerek. El bolyp birigip, úlken jetistikterge jete alamyz», - dedi óz tańdaýyn jasaǵan Qumar Aqsaqalov.
Bul ýchaskede sondaı-aq oblys ákiminiń birinshi orynbasary Marat Tasmaǵambetov zaıybymen jáne 71-shi Kann kınofestıvaliniń «Úzdik áıel róli» nomınatsııasynyń jeńimpazy Samal Eslıamova daýys berdi.