SQO ákimdiginiń sheneýnigi áıelimen birge qarjy jymqyrdy dep kúdiktelýde

NUR-SULTAN. QazAqparat - Soltústik Qazaqstan oblysynyń sybaılas jemqorlyqqa qarsy qyzmeti oblystyq Qarjy basqarmasy basshysynyń orynbasarynyń bıýdjet qarajatyn jymqyrý faktisin anyqtady, dep habarlaıdy QazAqparat tilshisi.

«Ol óz jubaıymen aldyn ala sóz baılasqan adamdar tobymen úlestes kásiporyn arqyly áreket jasaǵan. Jer ýchaskesin bólý boıynsha jerge ornalastyrý jobalaryn daıyndaýǵa jalǵan sharttarǵa qol qoıý arqyly 83 mln teńge somasynda bıýdjet qarajatyn aldap jymqyrǵan degen kúdikke ilinip otyr», - delingen agenttiktiń baspasóz qyzmeti taratqan habarlamada.

Agenttik málimetine sáıkes, tergeý nusqasyna saı ol 70 mln teńgeni qolma-qol aqshaǵa aınaldyrǵan. Onyń bir bóligin AQSh dollaryna aıyrbastap, jol talǵamaıtyn qymbat kólik satyp alǵan.

«Osy jyldyń 19 maýsymynda bıýdjet qarajatynyń 19,5 mln teńge somasyndaǵy kezekti transhyn qolma-qol aqshaǵa aınaldyrý kezinde atalmysh sheneýniktiń jubaıy ustaldy», - dedi vedomstvodan.

Sheneýnik ýaqytsha ustaý ızolıatoryna qamaldy. Oǵan qatysty bultartpaý sharasyn tańdaý máselesi sheshilýde.

Onyń zaıybyna qatysty kinásin tolyq moıyndaýyna jáne eki jas balasynyń bar bolýyna baılanysty protsessýaldyq ustaý sharasy qoldanylmaǵan. Tergeý jalǵasýda.